Միացեալ Նահանգներու նախագահ Տանըլտ Թրամփ նշեց, որ իր ուքրանացի պաշտօնակից Վոլոտիմիր Զելենսքիէն որոշ չափով հիասթափուած է, որովհետեւ Ռուսիոյ հետ պատերազմին վերջ տալու իր առաջարկած խաղաղութեան ծրագիրին յառաջ մղման մասնակից չէ:
Թրամփ «Քենետի» կեդրոնի կազմակերպած ձեռնարկի ընթացքին լրագրողներու հարցումին պատասխանելով յայտնեց. «Ռուսիոյ նախագահ Վլատիմիր Փութինի եւ ուքրանացի ղեկավարներուն հետ խօսեցայ, ներառեալ Զելենսքին: Պէտք է ըսեմ, որ որոշ չափով հիասթափուած եմ, որովհետեւ Զելենսքին տակաւին առաջարկը չէ կարդացած, եւ ատիկա քանի մը ժամ առաջ էր»:
Նշենք, որ շաբաթ օր աւարտեցան ամերիկացի եւ ուքրանացի պաշտօնատարներու միջեւ օրերու վրայ երկարած բանակցութիւնները, որոնց հեռաձայնային կապի ճամբով մասնակցեցաւ Զելենսքի:
Բանակցութիւնները աւարտեցան առանց յստակ յառաջընթացի արձանագրման, հակառակ Ուքրանիոյ նախագահին «իսկական խաղաղութեան» հասնելու համար յաւելեալ բանակցութիւններ վարելու խոստումին:
Ամերիկացի պատուիրակներ Սթիւ Ուիթքոֆ եւ Ճարետ Քուշներ նախքան այդ Քրեմլինի մէջ հանդիպում ունեցած էին Ռուսիոյ նախագահ Վլատիմիր Փութինի հետ: Մոսկուան հանդիպումի ընթացքին ամերիկեան ծրագիրէն որոշ կէտեր մերժած էր: