«Էն. Պի. Էյ.» Տիւրենթ Եւ Հարտըն Տակաւին Կը Փայլին Պատմութեան Նոր Էջեր Գրելով

Մրցանիշները կը բարելաւուին, նոր մարզիկներ զանազան մրցանիշներ կրնան ձեռք ձգել, ուրիշներ պատմութեան մէջ միշտ կը յիշուին կա՛մ կէտերը նշանակելով, կա՛մ ալ ախոյեանութեան տիտղոսներ ձեռք ձգելով:

«Էն. Պի. Էյ.»-ի պարագային մրցանիշներու շատ ձեւեր կան: Վեթերան Քեւին Տիւրենթ, որ «Էն. Պի. Էյ.»-ի պատմութեան լաւագոյն մարզիկներէն կը նկատուի թէ՛ յարձակողական եւ թէ՛ պաշտպանողական իր կարողութիւններուն համար, շաբաթավերջին իր կէտերու հաշիւը հասցուց 31 հազարի` դառնալով պատմութեան 8-րդ մարզիկը, որ կ՛անցնի այդ սահմանը:

37 տարեկան Տիւրենթ իր 1141-րդ մրցումին հասաւ այդ մրցանիշին` հաւասարելով Լըպրոն Ճէյմսին, որ երրորդ դիրքը կը գրաւէ, Մայքըլ Ճորտընի (1.011 մրցում) եւ Ուիլթ Չեմպըրլէյնի (1.015) ետին:

Այլ մարզիկներ, որոնք անցած են 31 հազար կէտերու սահմանը` Քարիմ Ապտուլ Ժապպարը, Քարլ Մալոնը, Քոպի Պրայընթը եւ Տըրք Նովիթցքին են:

Տիւրենթ, որ 2007-ին մուտք գործած էր «Էն. Պի. Էյ.» իր առաջին տարեշրջանը կը բոլորէ Հիուսթըն Ռոքեթցի հետ` ամրան լքելէ ետք Ֆինիքս Սանզը:

Միւս կողմէ, 11 անգամ «Օլ Սթար» մրցումին մասնակցած Ճէյմս Հարտըն շաբաթավերջին մտաւ «Էն. Պի. Էյ.»-ի պատմութեան ամէնէն շատ կէտեր նշանակողներու առաջին 10-ի ցանկին մէջ:

Թերեւս շատերու համար զարմանալի է ասիկա, որովհետեւ Հարտըն իր «Էն. Պի. Էյ.»-ի ասպարէզի առաջին 3 տարեշրջաններուն պահեստի մարզիկ էր, ան իր «Էն. Պի. Էյ.»-ի ասպարէզը ամբողջովին «գետինը» անցուցած է եւ ոչ թէ թռչելով դէպի կողով, եւ ան ունի մարմին մը որ շատ մը արհեստավարժ ֆիզիքական մարզիչներու կարծիքով պասքեթպոլի շատ յարմար չէ եւ պատրաստ չէր… 17 տարեշրջաններ խաղալու:

Սակայն Հարտըն ինքզինք փաստեց եւ 28 հազար 303 կէտերէ ետք մուտք գործեց լաւագոյն 10-ի ցանկին մէջ:

Այդ ցանկին մէջէն միայն Լըպրոն Ճէյմս (42.268 կէտ) եւ Քեւին Տիւրենթ (31.024) տակաւին կը խաղան այս տարեշրջանին:

Շաբաթավերջին ախոյեան Օքլահոմա Սիթի Թանտըր 131-101 արդիւնքով պարտութեան մատնեց Եութա Ճեզը` արձանագրելով յաջորդական 15-րդ յաղթանակը, նոյնիսկ առանց հիմնական մարզիկներու, որոնք շատ կարճ ելոյթ ունեցան:

Թանտըր 17 փորձերէն 11 յաջող 3 կէտնոց կողովներ նշանակեց առաջին մասին` նշանակելով 45 կէտ:

Օքլահոմայի 23-րդ յաղթանակը 24 մրցումներու ընթացքին պատմական կը նկատուի, որովհետեւ միայն Շիքակօ Պուլզ եւ Կոլտըն Սթէյթ Ուորիըրզ յաջողած են այդ մէկը իրագործել մինչեւ օրս:

Ճէյլըն Ուիլիամս 25 կէտ եւ 8 էսիսթ ձեռք ձգեց ի նպաստ Օքլահոմայի: Լոս Անճելըս Լէյքըրզ 112-108 արդիւնքով պարտութեան մատնեց Ֆիլատելֆիա 76-ըրզը:

Լուքա Տոնչիչ 31 կէտ, 15 ռիպաունտ եւ 11 էսիսթ ձեռք ձգեց թրիփըլ տապըլ իրագործելով, մինչ վեթերան Լըպրոն Ճէյմս 29 կէտ նշանակեց Լէյքըրզի հաշուոյն: Թայրիս Մեքսի եղաւ Ֆիլատելֆիա աստղը` նշանակելով 28 կէտ եւ 9 էսիսթ, մինչ Ժոել Էմպիիտ տակաւին չկրցաւ իր մակարդակը վերագտնել, եւ բաւականացաւ 16 կէտով:

Ստորեւ` երէկուան մրցումներուն արդիւնքները.

Նիւ Եորք Նիքս – Օրլանտօ Մեճիք 106-100
Թորոնթօ Ռեփթըրզ – Պոսթըն Սելթիքս 113-121
Չարլոթ Հորնեթց – Տենվըր Նակեթց 106-115
Մեմֆիս Կրիզլիզ – Փորթլենտ Թրէյլ Պլէյզըրզ 119-96
Շիքակօ Պուլզ – Կոլտըն Սթէյթ Ուորիըրզ 91-123
Ֆիլատելֆիա 76-ըրզ – Լոս Անճելըս Լէյքըրզ 108-112
Եութա Ճեզ – Օքլահոմա Սիթի Թանտըր 101-131