8 դեկտեմբերի 2025 – 12:05 AMT
PanARMENIAN.Net – Ներքին գործերի նախարարությունը հրապարակել է իրազեկող տեսահոլովակ, որում ներկայացվում է վարքագծի կանոնների ամբողջական ցանկ՝ երկրաշարժի ժամանակ հանրային տրանսպորտում գտնվելու պարագայում։
ՆԳՆ-ն տեղեկացրել է, որ ցնցումների պահին կարող է թվալ, թե վնասվել է փոխադրամիջոցի անիվը կամ մեքենայի ղեկավորումը խափանվել է։
«Երկրաշարժի ժամանակ հանրային տրանսպորտի վարորդը պետք է դանդաղեցնի ընթացքը, սակայն կտրուկ չարգելակի, որ ուղևորները չտուժեն,
հանրային տրանսպորտի դռները բացվելուն պես ուղևորները պետք է առանց խուճապի տարհանվեն հնարավորինս բաց, անվտանգ տարածք,
եթե կան տուժածներ՝ հնարավության դեպքում կազմակերպեք առաջին օգնություն։
Հիշե՛ք, տրանսպորտային միջոցում մշտապես պետք է լինի առաջին բուժօգնության պայուսակ, կրակմարիչ, լապտեր և ջուր։
Հետևեք պաշտոնական տեղեկատվությանը՝ ձեր հետագա գործողությունները կատարելու համար։
Հարգելի՛ վարորդներ,
Ագելվում է տրանսպորտային միջոցը կայանել կամուրջների տակ կամ վրա, բազմահարկ շենքերին մոտ, էլեկտրասյուների և էլեկտրական գծերի կամ գովազդային վահանակների տակ, ծառերի, հենապատերի, բենզագազալցակայանների մոտ,
տրանսպորտային միջոցը պետք է կայանել հնարավորինս բաց տարածքներում, այլ մեքենաներից անվտանգ հեռավորության վրա․ նման դեպքերում ուղևորները կարող են մնալ իրենց տեղերում,
եթե մեքենան հայտնվել է վտանգավոր տեղանքում՝ պետք է կազմակերպել ուղևորների դուրսբերումը՝ հնարավորինս անվտանգ տարածք,
իրավիճակի վերաբերյալ պետք է տեղեկացնել համապատասխան ծառայություններին,
Ցնցումների դադարից հետո չպետք է շարժվել, քանի չի ստացվել ճանապարհի անվտանգ լինելու վերաբերյալ պաշտոնական տեղեկություն»,- ասված է հաղորդագրության մեջ։