Ռուսաստանում Մեծ Բրիտանիայի գործերի ժամանակավոր հավատարմատարը կանչվել է ԱԳՆ, որտեղ նրան վճռական բողոք է ներկայացվել՝ կապված Լոնդոնի կողմից Ուկրաինային անօդաչու թռչող սարքերի և այլ զինատեսակների մատակարարումների հետագա ավելացման հետ։ Այս մասին ասվում է ՌԴ ԱԳՆ մամուլի հաղորդագրության մեջ։
«Հատուկ նշվել է, որ Միացյալ Թագավորության վարած քաղաքականության պայմաններում ռուսական կողմն իրեն իրավունք է վերապահում պատասխան գործողությունների՝ ինքնապաշտպանության իրավունքի իրացման շրջանակում։ Շեշտվել է, որ Ուկրաինայում գտնվող բրիտանական ցանկացած ռազմական օբյեկտ, որն օգտագործվում է Ռուսաստանի տարածքին հարվածներ հասցնելու համար, համարվում է օրինական թիրախ։ Ընդգծվել է, որ իրավիճակի հնարավոր հետագա բացասական զարգացման ողջ պատասխանատվությունը կրում է Լոնդոնը։ Բրիտանական կողմին պահանջ է ներկայացվել հրաժարվել էսկալացիոն քաղաքականությունից և իր գործողությունները համապատասխանեցնել միջազգային պարտավորություններին»,- նշվում է հաղորդագրության մեջ։