Ռուսաստանում մեկնարկել է խորհրդարանական ընտրությունների եռօրյա քվեարկությունը։ Դրանք երկրում՝ 2022 թվականին Ուկրաինայի դեմ պատերազմից հետո անցկացվող առաջին խորհրդարանական ընտրություններն են։
Ընտրություններին կուսակցական ցուցակներով մասնակցում է 10 քաղաքական ուժ։ «Յաբլոկո» կուսակցությունը նախկինում հեռացվել էր ընտրություններից։
Ընտրություններին մասնակցելու իրավունք ունի 111 միլիոն քաղաքացի։ Իշխանությունները թույլատրել են նաև էլեկտրոնային քվեարկություն։ Ընտրատեղամասերը բացվել են ուրբաթ օրը և կփակվեն կիրակի։
Պետդումայի նոր գումարման 450 պատգամավորներից կեսը՝ 225-ը, ընտրվելու են միամանդատ ընտրատարածքներից, իսկ մյուս 225 մանդատները բաշխվելու են կուսակցական ցուցակներով։
Քվեարկությունից առաջ Ռուսաստանի նախագահ Վլադիմիր Պուտինը դիմել է քաղաքացիներին՝ հայտարարելով, որ նրանց ընտրությունը և վճռականությունը պետք է ցույց տան, որ միլիոնավոր մարդիկ աջակցում են ռուս զինվորականներին և միավորված են ընդհանուր արժեքներով, պատմական հիշողությամբ ու հայրենիքի հանդեպ սիրով։
Ակնկալվում է, որ Կրեմլի հիմնական քաղաքական ուժը՝ «Եդինայա Ռոսիա» («Միասնական Ռուսաստան») կուսակցությունը կպահպանի մեծամասնությունը խորհրդարանի ստորին պալատում՝ Պետական դումայում։