ՀՀ տարածքից Գյումրիում տեղակայված ռուսական 102-րդ ռազմաբազան հանելը երկրի համար նոր արկածախնդրություն է: Այս մասին ԱԺ-ում ճեպազրույցի ժամանակ ասաց «Հայաստան» խմբակցության պատգամավոր, ՀՅԴ ԳՄ անդամ Իշխան Սաղաթելյանը:
ՀՀ վարչապետ Նիկոլ Փաշինյանը լրագրողների հետ զրույցում հայտարարել էր, թե ռուսական ռազմաբազայի ներկայությունը ՀՀ-ում կենսական անհրաժեշտություն չէ։ ՌԴ նախագահ Վլադիմիր Պուտինն էլ սեպտեմբերի 1-ին Բիշքեկում Փաշինյանի հետ հանդիպումից հետո լրագրողների հետ զրույցում հայտարարեց` եթե Հայաստանը համարում է, որ իրեն ռուսական ռազմաբազա պետք չէ, Ռուսաստանը պատրաստ է այն դուրս բերել նույնիսկ վաղը։
«Մենք գտնում ենք, որ այդ ռազմաբազան Հայաստանում ունի առաքելություն: Հայաստանին անպաշտպան թողնել Թուրքիայի և Ադրբեջանի երախում այս աշխարհաքաղաքական իրավիճակում՝ արկածախնդրություն է Հայաստանի Հանրապետության համար: Դա նոր անվտանգային սպառնալիքներ կբերի մեր երկրի համար, և չպետք է այդ ուղղությամբ ու ԵԱՏՄ-ից դուրս գալու գործընթացի ճանապարհով գնալ»,- ասաց Իշխան Սաղաթելյանը:
Նա նաև պնդեց՝ ԵԱՏՄ-ից դուրս գալուց հետո ԵՄ-ի մաս կազմելու այլընտրանք չունի Հայաստանը, իսկ ՀԱՊԿ-ից դուրս գալուց հետո էլ ՆԱՏՕ-ի մաս դառնալու այլընտրանք չկա:
Նշենք, որ «Ուժեղ Հայաստան» կուսակցության առաջնորդ Սամվել Կարապետյանը հայտարարել էր, որ 102-րդ ռազմաբազայի դուրսբերումը Հայաստանի համար անվտանգային իմաստով լավ հետևանքներ չի ունենա։ Պնդել էր՝ որևէ ռազմաբազա պետք է լինի ՀՀ-ում, և եթե ռուսները չլինեն, ապա թուրքերը կլինեն։
Կարդացել են
անգամ