«Այս ընթացքում ՀՀ երկրորդ նախագահի դեմ կայացված որոշումները բողոքարկման գործընթացում են։ Ակնկալում ենք, որ հաջորդ ատյաններում դատարանները, որոնք քննելու են այս գործերը, կառաջնորդվեն օրենքի տառով և չեն կրկնի իրենց նախորդների օրինակները»,- այս մասին մամուլի ասուլիսի ժամանակ ասել է ՀՀ երկրորդ նախագահ Ռոբերտ Քոչարյանի փաստաբան Հովհաննես Խուդոյանն՝ անդրադառնալով նախագահի դեմ հարուցված նոր քրեական հետապնդումներին։
Նրա խոսքով՝ իրավապահ և դատական համակարգը պետք է զգույշ և զուսպ մոտենա հարցին, քանի որ ստեղծված իրավիճակը մտահոգիչ միտումներ է դրսևորում։
«Կայացված որոշումները մենք դիտարկում ենք որպես ակնհայտ ապօրինի և հանցավոր, ուստի հորդորում ենք իրավապահ և դատական համակարգին զգույշ մոտենալ հարցին: Նախորդ տարիների համեմատությամբ տեսնում ենք, որ նոր քրեական հետապնդումները դարձել են շատ ավելի կոպիտ՝ օրենքի խախտման և մարդու իրավունքների տոտալ անտեսման տեսանկյունից»,- հավելել է փաստաբանը։