Թուրքիայի նախագահ Ռեջեփ Թայիփ Էրդողանը հայտարարել է, որ Անկարան դեմ չէ որևէ երկրի, հասարակության, հավատքի կամ մշակույթի, սակայն հանդես է գալիս ցանկացած անօրինականության, անարդարության, ճնշման և «ավազակության» դեմ։
«Ես ուզում եմ այս մասին հստակ և միանշանակ հայտարարել՝ մեկընդմիշտ․ ոչ ոք չպետք է մեր արժանապատիվ և զուսպ դիրքորոշումը թուլություն համարի կամ թույլ տա, որ այն կեղծ ակնկալիքներ առաջացնի։ Մենք չենք պատրաստվում նստել տրիբունաներում և հետևել մեր տարածաշրջանում մեր երկիրը շրջափակելուն ուղղված թշնամական գործողություններին»,- հայտարարել է Էրդողանը։
Նրա խոսքով՝ Թուրքիան դեմ չէ որևէ երկրի, հասարակության, հավատքի կամ մշակույթի, և նման բան «ընդհանրապես չի կարող դիտարկվել որպես հնարավոր տարբերակ»։
«Սակայն Թուրքիան հանդես է գալիս ցանկացած անօրինականության, ցանկացած անարդարության, ճնշման ցանկացած ձևի և ցանկացած ավազակության դեմ՝ անկախ նրանից, թե ով է դրանք իրականացնում, և շարունակելու է դա անել»,- ասել է Թուրքիայի նախագահը։
Էրդողանը նաև հայտարարել է, որ Թուրքիան որևէ մեկի նկատմամբ թշնամանք չի տածում և ցանկանում է շարունակել իր ուղին՝ որպես անկախ, կայուն ու բարգավաճ պետություն։
«Մենք երբեք թույլ չենք տա խոչընդոտել այդ ճանապարհը։ Նրանք, ում անհանգստացնում է մեր երկրի հզորացումը և տարածաշրջանում խաղաղություն ու կայունություն հաստատելու մեր ջանքերը, չեն կարողանա ստիպել մեզ շեղվել մեր ընտրած ուղուց»,- նշել է նա։
Թուրքիայի նախագահը հավելել է, որ «ոչ ոք ի վիճակի չէ փոխելու պատմության ընթացքը»։
«Թուրքիան ձեռք կմեկնի իր բարեկամներին, կգրկի իր հարազատներին և կմիավորվի իր եղբայրների հետ»,- ասել է Էրդողանը՝ ընդգծելով, որ «Թուրքիայի հետ բարեկամություն անողները կշահեն, իսկ թշնամանք տածողները՝ կպարտվեն»։