ՀՀ ԱԺ փոխնախագահ Վահագն Ալեքսանյանը և Շվեյցարիայի դեսպանն անդրադարձել են երկկողմ համագործակցությանը, խորհրդարանական դիվանագիտությանը և ժողովրդավարական բարեփոխումներին:
Սեպտեմբերի 7-ին Հայաստանի Հանրապետության Ազգային ժողովի փոխնախագահ Վահագն Ալեքսանյանն ընդունել է Հայաստանում Շվեյցարիայի Համադաշնության արտակարգ և լիազոր դեսպան Անդրեա Բարբարա Բաումանին: Ողջունելով դիվանագետին՝ խորհրդարանի խոսնակի տեղակալն ընդգծել է Բեռնի կառավարման համակարգի օրինակելի լինելը Երևանի համար:
«Շվեյցարիան Հայաստանի համար զարգացման մոդել է»,- նշել է Ալեքսանյանը՝ հավելելով, որ հայկական կողմը խիստ բարձր է գնահատում շվեյցարական հարուստ փորձը խորհրդարանական կառավարման ոլորտում:
Ինչպես հաղորդում է Ազգային ժողովի լրատվական ծառայությունը, հանդիպման ընթացքում կողմերը գոհունակություն են հայտնել հայ-շվեյցարական հարաբերությունների դինամիկ զարգացման կապակցությամբ՝ հատուկ շեշտելով երկու երկրների խորհրդարանական բարեկամական խմբերի արդյունավետ ու ակտիվ աշխատանքը:
Դեսպանի խնդրանքով Վահագն Ալեքսանյանը ներկայացրել է օրենսդիր մարմնում իշխող մեծամասնության և ընդդիմադիր խմբակցությունների փոխգործակցության ներկայիս պատկերը, ինչպես նաև խոսել «Քաղաքացիական պայմանագիր» խմբակցության քաղաքական առաջնահերթությունների մասին:
Զրույցի առանցքային թեմաներից են եղել նաև ներքին ժողովրդավարական բարեփոխումները: ԱԺ փոխնախագահը կարևորել է խորհրդարանական վերահսկողության անկյունաքարային դերը հակակոռուպցիոն պայքարում և հրատապ համարել ՀՀ Ընտրական օրենսգրքի բարեփոխումների իրագործումը:
Պաշտոնական հանդիպման ավարտին զրուցակիցները մտքեր են փոխանակել երկկողմ հետաքրքրություն ներկայացնող մի շարք այլ հարցերի, ինչպես նաև Հայաստան-Եվրամիություն հարաբերությունների ընդլայնվող օրակարգի շուրջ: