Դաղստանի Կիզլյար քաղաքում ուսումնական հաստատություններից մեկում վեճը վերածվել է դանակահարության։ 18-ամյա ուսանողը կասկածվում է 16-ամյա տղային դանակով հարվածելու մեջ։
Տարածաշրջանի քննչական կոմիտեի տվյալներով՝ դեպքը տեղի է ունեցել սեպտեմբերի 2-ին՝ մոտավորապես ժամը 14:17-ին, դասարաններից մեկում։
Նախնական տեղեկություններով՝ երիտասարդների միջև վիճաբանություն է սկսվել, որի ընթացքում 18-ամյա ուսանողը գրպանից հանել է ծալովի դանակ և հարվածել 16-ամյա տղային։
Տուժածին տեղափոխել են Կիզլյարի կենտրոնական քաղաքային հիվանդանոց, որտեղ նա բուժօգնություն է ստացել վիրաբուժական բաժանմունքում։
Բժիշկների նախնական գնահատմամբ՝ երիտասարդը ստացել է որովայնի հատվածի ծանր վնասվածք, այդ թվում՝ լյարդի վնասում։
Past.am-ի փոխանցմամբ՝ դեպքի առթիվ իրավապահները քննություն են իրականացնում։ Պարզվում են միջադեպի բոլոր հանգամանքները, ինչպես նաև վիճաբանության պատճառները։