Հայ քանոնահարուհի Մարիաննա Գևորգյանը դարձել է InterContinental Music Awards 2026 միջազգային մրցույթի «Լավագույն գործիքային կատարող» անվանակարգի հաղթողներից մեկը, հայտնում է մրցույթի պաշտոնական կայքը։
Գևորգյանը մրցույթում ներկայացրել է 18-րդ դարի հայ աշուղ Սայաթ-Նովայի «Eshxemed» ստեղծագործության իր կատարումը։ Մրցույթի պաշտոնական ցուցակում նա ներկայացված է Հայաստանի անունից։
Մրցույթին մասնակցության հայտ է ներկայացրել ավելի քան 3500 երաժիշտ՝ աշխարհի ավելի քան 100 երկրից։ Գևորգյանը Հայաստանից «Լավագույն երաժիշտ» անվանակարգի եզրափակիչ անցած միակ մասնակիցն էր։ Հաղթողների անունները հայտարարվել են օգոստոսի 23-ին կայացած առցանց մրցանակաբաշխության ժամանակ։
Մարիաննա Գևորգյանը Երևանի Կոմիտասի անվան պետական կոնսերվատորիայի շրջանավարտ է։ Նա Կոմիտասի անվան կամերային երաժշտության ազգային կենտրոնի «Տաղարան» հին երաժշտության համույթի մենակատար է։
2020 թվականին քանոնահարուհին արժանացել է World Folk Vision միջազգային մրցույթի գլխավոր մրցանակին՝ «Աշխարհի ժողովուրդների երաժշտություն» անվանակարգում։
InterContinental Music Awards-ը Լոս Անջելեսում գործող միջազգային երաժշտական մրցանակաբաշխություն է, որն անցկացվում է 2011 թվականից։
Մրցույթին կարող են մասնակցել ինչպես պրոֆեսիոնալ, այնպես էլ սկսնակ երաժիշտներ՝ ներկայացնելով հեղինակային ստեղծագործություններ կամ կատարումներ։ Աշխատանքները գնահատվում են նորարարության, ստեղծագործության կառուցվածքի, կատարման և ձայնագրության որակի, ինչպես նաև մշակութային առանձնահատկությունների հիման վրա։
Կազմակերպիչների տվյալներով՝ տարբեր տարիներին մրցույթին մասնակցել են ավելի քան 70 երկրների ներկայացուցիչներ։
