Չինաստանի նախագահ Սի Ցզինպինը երեքշաբթի ժամանել է Եգիպտոս։ Սա նրա առաջին այցն է արաբական աշխարհի ամենաբազմամարդ երկիր վերջին տասը տարվա ընթացքում։
Այցը Սի Ցզինպինի այս տարվա երկրորդ արտասահմանյան ուղևորության երկրորդ փուլն է։ Դրանից առաջ նա Ղրղզստանում մասնակցել է Շանհայի համագործակցության կազմակերպության գագաթնաժողովին, որի շրջանակում հանդիպումներ է ունեցել Ռուսաստանի նախագահ Վլադիմիր Պուտինի և այլ երկրների առաջնորդների հետ։
Չինական «Սինհուա» պետական լրատվական գործակալության հրապարակած հոդվածում Սի Ցզինպինը նշել է, որ Չինաստանն ու Եգիպտոսը «միմյանց կողքին կանգնած մտերիմ եղբայրներ են» իմպերիալիզմի և գաղութատիրության դեմ պայքարում։ Նա նաև ընդգծել է, որ Պեկինը պատրաստ է ուսումնասիրել երկու երկրների միջև համագործակցության խորացման նոր հնարավորությունները։
Սի Ցզինպինին Կահիրեի միջազգային օդանավակայանում դիմավորել է Եգիպտոսի նախագահ Աբդել Ֆաթահ Ալ-Սիսին։
Սի Ցզինպինի այցը տեղի է ունենում Մերձավոր Արևելքում լարվածության և Իրանի պատերազմի հետևանքների ֆոնին։ Հակամարտությունը զգալի ազդեցություն է ունեցել էներգետիկայի համաշխարհային շուկաների վրա և նոր հարցեր է առաջացրել տարածաշրջանի երկրների անվտանգության քաղաքականության վերաբերյալ, այդ թվում՝ ԱՄՆ-ի հետ նրանց երկարաժամկետ գործընկերության հարցում։
Վերջին օրերին Եգիպտոսի պետական լրատվամիջոցները լայնորեն անդրադարձել են Կահիրեի և Պեկինի միջև խորացող տնտեսական ու ռազմական համագործակցությանը։ Առանձնահատուկ ուշադրություն է դարձվել նաև Եգիպտոսի պատմական դերին՝ որպես առաջին արաբական և աֆրիկյան երկրի, որը 70 տարի առաջ դիվանագիտական հարաբերություններ է հաստատել Չինաստանի հետ։
«Եգիպտոսը և Չինաստանը դարձել են գործընկերներ, որոնք միասին նպաստում են միջազգային համակարգում Գլոբալ Հարավի դերի ամրապնդմանը»,- «Ալ-Ահրամ» պետական թերթում հրապարակված հոդվածում գրել է Եգիպտոսի նախագահ Աբդել Ֆաթահ Ալ-Սիսին։