ԱՄՆ-ն և Իրանը դարձյալ հայտնվել են պատերազմական վիճակում։
ԱՄՆ զինված ուժերի Կենտրոնական հրամանատարությունը հայտարարել է, որ երեքշաբթի ավարտին է հասցրել Իսլամական հեղափոխության պահապանների կորպուսի թիրախների, այդ թվում՝ հակաօդային պաշտպանության օբյեկտների, ռադարային համակարգերի, ծովային միջոցների ու կառույցների, ականային կառույցների և կապի օբյեկտների ուղղությամբ հասցված հարվածների շարքը։
Իրանական ԶԼՄ-ները հայտնել են ողջ երկրով մեկ բազմաթիվ թիրախների վրա կատարված հարձակումների մասին, որոնցից շատերը տեղի են ունեցել Հորմուզի նեղուցի մոտակայքում։
Իրանն իր հերթին հայտարարել է Հորդանանում և Իրաքում գտնվող ամերիկյան օբյեկտներին հարվածներ հասցնելու մասին՝ համաձայն պաշտոնական հայտարարությունների, իսկ իրանական ԶԼՄ-ները հայտնել են, որ այն հարձակվել է նաև Բահրեյնի վրա։
Ռազմական գործողությունների վերսկսումից հետո սկսվել են հոխորտալից հայտարարությունները. «Ինձ հիմա շատ ավելի է դուր գալիս մեր դիրքը․ գրեթե լիակատար վերահսկողություն Հորմուզի նեղուցի նկատմամբ և տնտեսության լիակատար փլուզում։ Նրանք պարզապես խաղարկում են անխուսափելին։ Ե՞րբ է իրանցի ժողովուրդը ապստամբելու և սկսելու պայքարել»,- ասել է Թրամփը։
Միաժամանակ, Իրանը սպառնացել է ԱՄՆ-ին և նրա դաշնակիցներին։
«Մենք զգուշացնում ենք, որ տարածաշրջանում ամերիկյան չարիքի շարունակությունը կբախվի ավելի կոշտ, ավելի մասշտաբային և կործանարար պատասխանի, և ագրեսիվ ամերիկյան բանակի հետ համագործակցող ցանկացած երկիր պետք է ընդունի դրա վտանգավոր հետևանքները»,- ասված է Իրանի միացյալ ռազմական հրամանատարության հայտարարության մեջ։