Իսլանդիայի կառավարությունը չի շարունակելու Եվրամիությանն անդամակցելու շուրջ բանակցությունները, հայտարարել է երկրի վարչապետ Կրիսթրուն Ֆրոստադոուտտիրը։ Այս մասին հայտնել է ՏԱՍՍ-ը։
Հայտարարությունը հնչել է օգոստոսի 29-ին տեղի ունեցած հանրաքվեի արդյունքների ամփոփումից հետո։ Հանրաքվեի ընթացքում հարց էր դրվել ԵՄ-ին անդամակցելու շուրջ բանակցությունները վերսկսելու վերաբերյալ։ Վերջին տվյալների համաձայն՝ մասնակիցների ավելի քան 52%-ը դեմ է քվեարկել։ Գործակալությունը նշում է, որ ԵՄ-ին անդամակցելու հակառակորդները խոսում էին երկրի ինքնիշխանության թուլացման և ձկնորսության ոլորտում սահմանափակումների առաջացման ռիսկի մասին։
Ֆրոստադոուտտիրը կարծիք է հայտնել, որ նման հանրաքվեներ չի կարելի անցկացնել ամեն տարի կամ երկու տարին մեկ։ Միևնույն ժամանակ նա նշել է, որ չի կարող ասել, թե ապագայում ԵՄ-ի հետ բանակցությունների հարցում իրավիճակը «չի փոխվի»։ Նա հավելել է, որ Իսլանդիան կշարունակի մնալ Եվրոպական տնտեսական տարածքի հուսալի գործընկերը։
Ինչպես հաղորդել է Euronews-ը, Եվրահանձնաժողովը զուսպ է արձագանքել հանրաքվեի արդյունքներին։ «Եվրահանձնաժողովն ի գիտություն է ընդունում Իսլանդիայում անցկացված հանրաքվեի արդյունքները։ Հանձնաժողովը հարգում է իսլանդացի ժողովրդի ընտրությունը։ Իսլանդիան շարունակում է մնալ Եվրամիության մերձավոր գործընկերը», — լրատվամիջոցը մեջբերում է ԵՀ ներկայացուցչի հայտարարությունը։
2009 թվականին Իսլանդիան ԵՄ անդամակցության հայտ էր ներկայացրել, 2013 թվականին բանակցությունները դադարեցվել էին, իսկ 2015 թվականին երկիրը հրաժարվել էր անդամակցելու գործընթացից։
