Բաքվում Լեհաստանի դեսպան Պավել Ռադոմսկին կանչվել է Ադրբեջանի արտաքին գործերի նախարարություն, որտեղ նրան բողոքի նոտա են հանձնել TVP World հեռուստաալիքով քննադատական ռեպորտաժի կապակցությամբ, հայտնում է ՏԱՍՍ-ը՝ հղում անելով Ադրբեջանի արտաքին գործերի նախարարության մամուլի ծառայությանը։
Խոսքը վերաբերում էր «Արևելյան ճեպընթաց» հաղորդմանը, որը հեռարձակվել էր օգոստոսի 26-ին լեհական անգլալեզու TVP World հեռուստաալիքով։ Հաղորդման ընթացքում քննարկվել է Ադրբեջանի ներքաղաքական իրավիճակը, այդ թվում՝ հիշատակել առանձին լրագրողների ձերբակալությունները և մեղադրել ընդդիմադիր ակտիվիստների հետապնդման մեջ։
Ադրբեջանի արտաքին գործերի նախարարությունը հայտարարել է, որ լեհական հեռուստաալիքի հաղորդումը պարունակում է «կողմնակալ, ոչ օբյեկտիվ և բացարձակապես անընդունելի հայտարարություններ՝ ուղղված ադրբեջանական պետության և երկրի ղեկավարության դեմ»։
Արտաքին գործերի նախարարությունը Լեհաստանի կառավարության կողմից ֆինանսավորվող TVP հեռուստաալիքով Ադրբեջանի մասին բացասական նյութերի տարածումը գնահատել է որպես «անբարյացակամ քայլ, որը հակասում է երկու երկրների միջև գործընկերության ոգուն և կարող է լուրջ վնաս հասցնել երկկողմ հարաբերություններին»։
«Լեհական կողմին կոչ է արվել անհապաղ և արդյունավետ միջոցներ ձեռնարկել՝ Ադրբեջանի դեմ նման սադրիչ արշավները դադարեցնելու համար», – հայտարարել է Արտաքին գործերի նախարարությունը։
