Իրանի արտաքին գործերի նախարարությունը հայտարարել է Օմանի հետ Հորմուզի նեղուցում համատեղ կառավարման ներքո ժամանակավոր ծովային միջանցք ստեղծելու շուրջ պայմանավորվելու մասին, հայտնում է ՏԱՍՍ-ը՝ հղում անելով նախարարությանը։
Նշվում է, որ երկու երկրների արտաքին գործերի նախարարները քննարկել են Հորմուզի նեղուցում նավագնացության վերականգնման հետագա գործողությունների փուլային ծրագիրը: «Այս նախաձեռնությունը ներառում է նեղուցում համատեղ կառավարման ներքո ժամանակավոր նավագնացության միջանցքի ստեղծում», – մեջբերել է գործակալությունը հաղորդագրությունը:
Կողմերը նաև համաձայնել են «համատեղ ջանքերով ականազերծել ժամանակավոր միջանցքը» և շարունակել «տեխնիկական բանակցությունները Հորմուզի նեղուցում մշտական նավագնացության միջանցքի համաձայնեցման և դրա համատեղ կառավարման մեխանիզմի մշակման վերաբերյալ»:
Օգոստոսի 5-ին Իրանի արտաքին գործերի նախարարության խոսնակը հայտարարել էր, որ Իրանը և Օմանը համաձայնության են եկել Հորմուզի նեղուցով նոր երթուղու աշխարհագրական կոորդինատների վերաբերյալ: Ըստ ԶԼՄ-ների՝ Իրանի և Օմանի միջև քննարկվող համաձայնագիրը նախատեսում է, որ նավերը Պարսից ծոց կմտնեն Իրանի կողմից վերահսկվող երթուղով և կշարժվեն Օմանի կողմից վերահսկվող երթուղով: Նավերից նաև վճարներ կգանձվեն նավարկության անվտանգությունն ապահովելու և ծովային միջավայրը պաշտպանելու համար։
