Ռուսաստանի Սամարայի մարզում «Օզոն» ընկերության լոգիստիկ համալիրը ենթարկվել է անօդաչու թռչող սարքերի հարձակման, հայտնել է շրջանի նահանգապետ Վյաչեսլավ Ֆեդորիշչևը։
Հարվածի հետևանքով պահեստում հրդեհ է բռնկվել, կան տուժածներ։
Նահանգապետի տվյալներով՝ գիշերը մարզը ենթարկվել է ԱԹՍ-ների մասշտաբային հարձակման, մի քանի տասնյակ դրոն խոցվել և ճնշվել է։ Վնասվել է նաև արդյունաբերական ձեռնարկություններից մեկը։
Ozon-ը հայտնել է, որ լոգիստիկ կենտրոնից մի քանի րոպեում տարհանվել է ավելի քան 500 աշխատակից։
Տեղում աշխատում են արտակարգ ծառայություններն ու շտապօգնության բրիգադները։
Ընկերությունը ժամանակավորապես վաճառքից հանել է տուժած պահեստում գտնվող ապրանքները։ Այն պատվերները, որոնք պետք է ուղարկվեին այդ կենտրոնից, կչեղարկվեն, իսկ գնորդներին կվերադարձվեն գումարները։
Ozon-ը նաև հայտարարել է, որ անհրաժեշտ օգնություն կցուցաբերի տուժած աշխատակիցներին։
