Եվրոպայի կլիմայագետները պարզել են, որ վերջին մի քանի տասնամյակների ընթացքում Եվրոպայում հողի խոնավության զգալի նվազումը էապես կուժեղացնի հաջորդող շոգ ամառային եղանակները՝ հանգեցնելով ջերմաստիճանային ռեկորդների կտրուկ ավելացմանը։ Այս մասին հայտնում է TASS-ը՝ հղում կատարելով գերմանական Լայպցիգի համալսարանի մամուլի ծառայությանը։ Վերջին տարիներին Երկրի վրա գլոբալ տաքացման հետ կապված կլիմայական փոփոխությունների հետևանքով զգալիորեն հաճախացել են երաշտները, տաք ալիքները և եղանակային այլ ծայրահեղ երևույթները։ Մասնավորապես, Եվրոպայում վերջին 10 տարիների ընթացքում գրանցվել են մի շարք հզոր տաք ալիքներ, ինչպես նաև երկարատև երաշտներ և ջրհեղե ղների շարքեր, որոնք հազարավոր մարդկանց կյանքեր են խլել, առաջացրել բերքի կորուստներ և խնդիրներ ստեղծել էլեկտրակայանների աշխատանքի համար։ Այս ծայրահեղ եղանակային երևույթների առաջացման բոլոր գործոններն ու հանգամանքները բացահայտելու նպատակով Եվրոպայի կլիմայագետները ստեղծել են կլիմայի մանրամասն մոդել, որը հաշվի է առնում ոչ միայն մթնոլորտում ընթացող գործընթացները, այլև մթնոլորտի փոխազդեցությունը հողի և ջրոլորտի հետ։
Այս մոդելի միջոցով գիտնականները հաշվարկել են, թե ինչպես են փոխվել և ինչպես կփոխվեն Արևմտյան Եվրոպայի բնորոշ ամառային ջերմաստիճանները ներկայիս տասնամյակում, ինչպես նաև նախաարդյունաբերական ժամանակաշրջանում՝ 1850–1900 թվականներին։ Ուսումնասիրությունները ցույց են տվել, որ ամռան երկրորդ կեսին երկարատև և ուժեղ շոգի ժամանակահատվածների առաջացման հավանականությունը կտրուկ աճել է։ Սա առաջին հերթին պայմանավորված է նրանով, որ վերջին մի քանի տասնամյակների ընթացքում եվրոպական հողերում խոնավության քանակը զգալիորեն նվազել է։ Ինչպես բացատրում են կլիմայագետները, Արեգակի ջերմային էներգիայի զգալի մասը ծախսվում է հողից ջրի գոլորշիացման վրա, ինչի շնորհիվ խոնավ հողը գործում է որպես տաք ալիքների բնական կարգավորիչ։ Հետևաբար, հողի չորացումը նպաստում է ամառային շոգի ուժեղացմանը։ Գիտնականներն ընդգծել են, որ այս հանգամանքը անհրաժեշտ է հաշվի առնել ապագայում տաք ալիքներին նախապատրաստվելիս։