Երասխից դեպի Նախիջևանի սահման և Գյումրիից Ախուրիկով դեպի Թուրքիայի սահման տանող երկաթուղային հատվածների վերակառուցումը կիրականացվի Հայաստանի պետական միջոցների հաշվին։ Այս մասին կառավարության նիստից…
Երասխից դեպի Նախիջևանի սահման և Գյումրիից Ախուրիկով դեպի Թուրքիայի սահման տանող երկաթուղային հատվածների վերակառուցումը կիրականացվի Հայաստանի պետական միջոցների հաշվին։ Այս մասին կառավարության նիստից հետո լրագրողների հետ ճեպազրույցում հայտարարել է վարչապետ Նիկոլ Փաշինյանը։
Լրագրողի հարցին՝ արդյոք ՀՀ պետբյուջեով աշխատանքներն իրականացնելու որոշումը նշանակում է, որ Ռուսաստանը մերժել է հայկական կողմի առաջարկը՝ մասնակցելու երկաթուղային հատվածների վերականգնմանը, Փաշինյանը պատասխանել է.
«Ո՛չ, չի նշանակում, շինարարությունն իրականացվելու է ՀՀ պետական միջոցների հաշվին»։
Հիշեցնենք՝ դեռ հունվարին Փաշինյանը հայտարարել էր, որ Հայաստանը Ռուսաստանից ակնկալում է սեղմ ժամկետում արձագանքել դեպի Ադրբեջան և Թուրքիա տանող երկաթուղու մի շարք հատվածների վերականգնման հարցին։
Օգոստոսի 6-ին ՌԴ փոխվարչապետ Ալեքսեյ Օվերչուկն էլ հայտարարել էր, որ Ռուսաստանը տարեսկզբին հայտնել է երկու կարևոր երկաթուղային հատվածների վերականգնմանը մասնակցելու պատրաստակամության մասին։
Հայաստանի երկաթուղային համակարգը 2008 թվականից կոնցեսիոն կառավարման է հանձնված «Հարավկովկասյան երկաթուղի» ընկերությանը։