ՊՆ-ն նոր մանրամասներ է հայտնել Ճամբարակում վրաերթի ենթարկված զինծառայողների վիճակի մասին

Ճամբարակում տեղի ունեցած վրաերթի հետևանքով վնասվածքներ ստացած զինծառայողներից երեքը հետազոտվել են և որևէ բժշկական միջամտության անհրաժեշտություն չունեն։ Այս մասին հայտնում են ՀՀ ՊՆ-ից։

Մյուս երեք զինծառայողների կյանքին նույնպես վտանգ չի սպառնում։ Նրանք շարունակում են գտնվել զինվորական հոսպիտալի բժիշկների հսկողության տակ։

Հիշեցնենք՝ օգոստոսի 19-ին՝ ժամը 21։00-ի սահմաններում, Ճամբարակ քաղաք տանող ավտոճանապարհին «ԳԱԶ-53» մակնիշի ավտոմեքենան դեռևս չպարզված հանգամանքներում վրաերթի է ենթարկել մի քանի զինծառայողների։

Վրաերթի հետևանքով զինծառայող Սուրեն Մամբրեի Վարդանյանը մահացել է։

Դեպքի բոլոր հանգամանքները պարզելու նպատակով քննություն է ընթանում։

Վրաերթի դեպքի առթիվ նախաձեռնվել է քրեական վարույթ՝ Քրեական օրենսգրքի 342-րդ հոդվածի 1-ին և 4-րդ մասերով (ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոնները խախտելը):