Փաստաբան Ռուբեն Մելիքյանի ֆեյսբուքյան իր էջում գրել է․ «Այն պայմաններում, երբ մեր երկրում մարդու իրավունքների պաշտպանը, մեղմ ասած, գործում է անարդյունավետ, հատկապես կարևորվում է խորհրդարանի մարդու իրավունքների մշտական հանձնաժողովի դերը։
Ութերորդ գումարման Ազգային ժողովում այդ պաշտոնն ի սկզբանե զբաղեցրել է ընդդիմադիր պատգամավոր Թագուհի Թովմասյանը, որը գործել է շատ արդյունավետ։ Թերևս հենց դա՛ էր պատճառը, որ 2 տարի անց քպ-ն որոշեց շինծու պատճառաբանությամբ հեռացնել Թովմասյանին հանձնաժողովի ղեկավարումից։
Իններորդ գումարման դե ֆակտո խորհրդարանում ևս այդ պաշտոնը բաժին է հասել ընդդիմությանը՝ «Հայաստան» դաշինքին։ Հուսով եմ՝ խմբակցությունում ճիշտ ընտրություն կկատարեն և կառաջադրեն իր ներքին արժեբանությամբ ու հանրային կերպարով մարդու իրավունքի նկատմամբ խորը ակնածանք ունեցող, նեղյալների համար կռիվ տվող թեկնածուի, որն ի վիճակի կլինի ստանձնել Հայաստանի դե ֆակտո օմբուդսմենի ծանր, բայց պատվաբեր առաքելությունը»։