Երևանի քաղաքապետարանի «Արև Արենա» համերգասրահում կայացավ «Արև Արենա» մանկապատանեկան ստեղծագործական ամառային ճամբարի փակման հանդիսավոր արարողությունը:
Երևանի քաղաքապետ Տիգրան Ավինյանի նախաձեռնությամբ ստեղծված մանկապատանեկան ստեղծագործական ճամբարում 5 շաբաթ շարունակ իրենց ամառային հանգիստն ու ժամանցն անցկացրեցին 7-ից 15 տարեկան 260 երեխաներ:
Ճամբարում փորձառու արվեստագետ-մանկավարժների ղեկավարությամբ գործում էին երաժշտարվեստի, կերպարվեստի, թատերարվեստի և ստեղծարար մտածողության զարգացման աշխատարաններ:
Բացի ուսումնական և ժամանցային ծրագրերից, կազմակերպվեցին նաև ճանաչողական այցեր: Երեխաները եղան Երևանի քաղաքի պատմության թանգարանում, «Էրեբունի» պատմահնագիտական արգելոց-թանգարանում, ներկա գտնվեցին Համազգային պետական թատրոնում հատուկ կազմակերպված ներկայացման ցուցադրությանը, այցելեցին Կենդանիների խնամքի կենտրոն:
Ճամբարի փակման հանդիսավոր երեկոյին երեխաները ներկայացան կերպարվեստի և դեկորատիվ-կիրառական արվեստի ցուցահանդեսով, հավաքական երգչախմբի կատարումներով, ստեղծարար մտածողության աշխատարանի նախագծերով և թատերական բեմականացումներով` բուռն ընդունելության արժանանալով «Արև Արենա» համերգասրահում ներկա հանդիսատեսի կողմից: