ՀՀ նախկին վարչապետ Հովիկ Աբրահամյանի որդուն՝ Ազգային ժողովի նախկին պատգամավոր Արգամ Աբրահամյանին, ձերբակալել են պատվիրված սպանության գործով։ Այս մասին Armenia Today-ին հայտնել են Քննչական կոմիտեից։
Աբրահամյանը նաև «Բարգավաճ Հայաստան» կուսակցության առաջնորդ Գագիկ Ծառուկյանի փեսան է։
Քննության վարկածով՝ նա Արտաշատ համայնքի նախկին ղեկավարի հետ մեղադրվում է 2023 թվականի ապրիլի 30-ին Երևանի Մյասնիկյան պողոտայում գտնվող բնակելի շենքի մոտ «Ավետարանական հավատքի քրիստոնյաներ» կազմակերպության հովիվ Սողոմոն Վլասյանի սպանությունը կազմակերպելու համար։
ՔԿ-ից հայտնել են, որ Աբրահամյանը կասկածել է կնոջը հովվի հետ անձնական հարաբերություններ ունենալու, ինչպես նաև նրան խոշոր չափերի գումարներ փոխանցելու համար։ Քննության տվյալներով՝ վրեժխնդրությունից դրդված՝ նա սպանությունը հանձնարարել է իր թիկնապահ Գ․Հ․-ին, որն էլ կրակել է հովվի վրա։
Ենթադրյալ կատարողի վերաբերյալ քրեական գործը՝ սպանության և զենքի ապօրինի շրջանառության հոդվածներով 2024 թվականի ապրիլին ուղարկվել էր դատարան։
Աբրահամյանի նկատմամբ հարուցվել է հանրային քրեական հետապնդում պատվիրված սպանություն կատարելուն դրդելու մեղադրանքով։ Ազգային անվտանգության ծառայության աշխատակիցներն օգոստոսի 8-ին ձերբակալել են նրան՝ կալանքը որպես խափանման միջոց ընտրելու միջնորդությամբ դատարան ներկայացնելու համար։
