Թաիլանդի արևմտյան հատվածում գտնվող Դոն Յայ Թոնգ հնագիտական վայրում պեղումների ընթացքում հայտնաբերվել են մոտ 2000 տարվա հնություն ունեցող երկու ոսկյա մատանի։ Ըստ տարածվող տեղեկությունների՝ մատանիները հայտնաբերվել են մարդու ոսկորների հետ միասին՝ Փետչաբուրի նահանգում իրականացվող պեղումների ժամանակ։ Մատանիներից մեկի վրա հայտնաբերվել են բրահմի գրին պատկանող փորագրություններ՝ հնագույն հնդկական գրային համակարգից։
Մասնագետների նախնական գնահատմամբ՝ գրությունը կարդացվում է որպես «pusarakhitasa», որը նշանակում է «Պուշյայի կողմից պաշտպանված»։ Հնագիտական վայրը թվագրվում է Թաիլանդի երկաթի դարաշրջանին՝ մոտ 1500-2500 տարի առաջ։ Փետրվարից ի վեր հնագետները տարածքում հայտնաբերել են ութ մարդկային կմախք, ոսկյա և բրոնզե զարդեր, խեցեղեն և այլ գտածոներ։ Մասնագետների կարծիքով՝ գտածոները վկայում են, որ տարածքում իրականացվել են հարուստ մարդկանց կամ հասարակության վերնախավի ներկայացուցիչների ծիսական թաղումներ։