168.am-ը գրում է.
Վերջին ժամերին համացանցում ակտիվորեն տարածվում են տեղեկություններ, թե երգչուհի Սյուզաննա Մելքոնյանը հոսպիտալացվել է։ Լուրերի տարածման պատճառը, ամենայն հավանականությամբ, երգչուհու ինստագրամյան էջում հրապարակված լուսանկարն է, որտեղ նա գտնվում է բուժհաստատությունում, ոտքը՝ վիրակապված։
Լուսանկարին կից Սյուզաննա Մելքոնյանը գրել էր.
«Շնորհակալ եմ հրաշք մասնագետին։ Ցավերս այնքան ուժեղ էին, որ չդիմացա մինչև առավոտ։ Բեմի կյանքն ի վերջո իրենն անում է․․․ Շատ սիրելի՛ մարդիկ, ոտքս չեմ կոտրել, այլ խնդիր է, որը ևս բավականին ցավոտ էր։ Շնորհակալ եմ բոլորիդ, դուք հրաշք եք»։
Մեզ հետ զրույցում նա նշեց, որ հոսպիտալացված չէ, առօրյա լարվածության և ծանրաբեռնված աշխատանքի հետևանքով ունեցել է սուր ցավեր, ինչի պատճառով դիմել է բժշկի։ Անհրաժեշտ միջամտությունից և բուժօգնությունից հետո, մի քանի ժամ անց, նա վերադարձել է տուն։
Սյուզաննա Մելքոնյանը վստահեցրեց, որ այս պահին իրեն լավ է զգում։ Նա իր շնորհակալությունն է հայտնել բուժանձնակազմին՝ մասնագիտական և հոգատար վերաբերմունքի համար, ինչպես նաև բոլոր այն մարդկանց, ովքեր անհանգստացել և հետաքրքրվել են իր առողջական վիճակով։
Միաժամանակ երգչուհին հորդորել է չտարածել ապատեղեկատվություն, քանի որ իրականությանը չի համապատասխանում այն տեղեկությունը, թե ինքը հոսպիտալացված է։
Նրա խոսքով՝ անհրաժեշտ է եղել բժշկական միջամտություն, ինչից հետո նույն օրը նա վերադարձել է իր բնականոն կյանքին։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ: