Մեր կառավարության վերջին հերթական նիստն է, կիրակի օրը հրաժարական ենք տալու․ Փաշինյան

ԵՐԵՎԱՆ, 30 հուլիսի․/ԱՌԿԱ/․ ՀՀ վարչապետ Նիկոլ Փաշինյանը նշեց կառավարության հրաժարականի օրը։   

«Մեր կառավարության վերջին հերթական նիստն է։ 9-րդ գումարման ԱԺ-ի ձևավորման առիթով կիրակի օրը հրաժարական ենք տալու, որից հետո ՀՀ նախագահը վարչապետ կնշանակի խորհրդարանական մեծամասնության ներկայացրած թեկնածուին», – ասաց Փաշինյանն այսօր կառավարության նիստի ժամանակ՝ նշելով, որ այս կազմով հանդիպում են վերջին անգամ։

2026 թվականի հունիսի 7-ի խորհրդարանական ընտրությունների արդյունքներով ձևավորված 9–րդ գումարման Ազգային ժողովի առաջին նիստը տեղի կունենա օգոստոսի 2-ին:

Նոր խորհրդարանի աշխատանքի մեկնարկից հետո պետք է անցկացվի վարչապետի առաջադրման և ընտրության ընթացակարգը, ինչից հետո կձևավորվի նոր կառավարությունը:

9–րդ գումարման Ազգային ժողովում ներկայացված կլինեն երեք քաղաքական ուժեր՝ իշխող «Քաղաքացիական պայմանագիր» կուսակցությունը՝ 64 պատգամավոր, «Ուժեղ Հայաստան» դաշինքը՝ 29 պատգամավոր և «Հայաստան» դաշինքը՝ 12 պատգամավոր: