Հայաստանը ներառվել է այն 21 երկրների ցանկում, որտեղ, ՄԱԿ-ի ՄԻԱՎ/ՁԻԱՀ-ի հարցերով համատեղ ծրագրի (UNAIDS) գնահատմամբ, 2025 թվականին ՄԻԱՎ-ով վարակման նոր դեպքերի թիվն ավելի քան 20%-ով գերազանցել է 2010 թվականի մակարդակը, նշված է UNAIDS-ի «United to End AIDS» հատուկ զեկույցում, որը հրապարակվել է հուլիսի 27-ին Ռիո դե Ժանեյրոյում անցկացվող ՁԻԱՀ-ի հարցերով 26-րդ միջազգային համաժողովին ընդառաջ։
Հայաստանից բացի, ցանկում ընդգրկվել են Աֆղանստանը, Ալժիրը, Բանգլադեշը, Բրազիլիան, Վենեսուելան, Եգիպտոսը, Եմենը, Ղրղզստանը, Կոնգոն, Կոստա Ռիկան, Մադագասկարը, Նիգերը, Պակիստանը, Պարագվայը, Պերուն, Սենեգալը, Սուդանը, Թունիսը, Ֆիլիպինները և Շրի Լանկան։
UNAIDS-ը պարզաբանում է, որ ցուցակում ներառվել են միայն այն երկրները, որոնց համար հրապարակվել են 2010 և 2025 թվականների գնահատականները, և որտեղ այդ տարիներից յուրաքանչյուրում արձանագրվել է վարակման առնվազն 200 նոր դեպք։
Հայաստանը պատկանում է Արևելյան Եվրոպայի և Կենտրոնական Ասիայի տարածաշրջանին, որն աշխարհի այն երեք տարածաշրջաններից մեկն է, որտեղ 2010 թվականից ի վեր ՄԻԱՎ-ով վարակման նոր դեպքերի թիվն աճել է (17%-ով)։
UNAIDS-ի ցուցանիշը ներկայացնում է նոր վարակումների մոդելավորված գնահատականը, մինչդեռ Հայաստանի ազգային վիճակագրությունն արտացոլում է հայտնաբերված և գրանցված դեպքերը։
Հայաստանի Ինֆեկցիոն հիվանդությունների ազգային կենտրոնի տվյալներով՝ 2025 թվականին ՀՀ քաղաքացիների շրջանում հայտնաբերվել է ՄԻԱՎ-ի 467 նոր դեպք և գրանցվել ՁԻԱՀ-ի 152 դեպք։
Օտարերկրացիների շրջանում հայտնաբերվել է ևս 47 դեպք (ընդհանուր՝ 514)։
ՀՀ քաղաքացիների շրջանում 2025 թվականի դեկտեմբերի 31-ի դրությամբ ընդհանուր առմամբ գրանցված է 6 625 ՄԻԱՎ-ի և 2 972 ՁԻԱՀ-ի դեպք։ Հակառետրովիրուսային բուժում է ստացել ՀՀ 4 258 քաղաքացի և 110 օտարերկրացի։
2025 թվականին գրանցված նոր դեպքերից 81,1%-ը փոխանցվել է հետերոսեքսուալ ճանապարհով, 12,6%-ը՝ նույնասեռական կոնտակտների, 5%-ը՝ ներարկային թմրամիջոցների օգտագործման հետևանքով, 0,4%-ը՝ մորից մանկանը, իսկ 0,9%-ի դեպքում ուղին չի սահմանվել։
