Ամենայն Հայոց կաթողիկոս Գարեգին Բ-ի և վեց եպիսկոպոսների գործով մեղադրական եզրակացությունը հաստատվել և ուղարկվել է դատարան, Armenia Today-ին հայտնել են Գլխավոր դատախազությունից:
Datalex դատական տեղեկատվական կայքի տվյալներով՝ Ամենայն Հայոց կաթողիկոսը և Գերագույն հոգևոր խորհրդի անդամները մեղադրվում են Մասյացոտնի թեմի կարգալույծ նախկին առաջնորդ Արման Սարոյանի դատական որոշման կատարմանը խոչընդոտելու մեջ, ով բողոքարկել էր իրեն թեմի ղեկավարությունից հեռացնելու վերաբերյալ խորհրդի որոշումը։
Գործով մեղադրյալների թվում են Գարեգին Բ-ն, արքեպիսկոպոսներ Նաթան Հովհաննիսյանը, Հայկազուն Նաջարյանը և Վահան Հովհաննիսյանը, ինչպես նաև եպիսկոպոսներ Մակար Հակոբյանը, Մուշեղ Բաբայանը և Հովնան Հակոբյանը։ Գործն Արմավիրի մարզային դատարանում է ստացվել հուլիսի 27-ին։
Գարեգին Բ-ն հունվարի 10-ին Սարոյանին ազատել էր պաշտոնից։ ՀՀ վարչապետ Նիկոլ Փաշինյանը հայտարարել էր, որ չի ճանաչում այդ որոշումը, իսկ Սարոյանը հայց էր ներկայացրել Մայր Աթոռի դեմ՝ պահանջելով վերականգնել թեմի առաջնորդի պաշտոնում։ Հունվարի 16-ին դատարանը Սարոյանին վերականգնել էր Մասյացոտնի թեմի առաջնորդի պաշտոնում՝ մինչև վերջնական դատական ակտը, իսկ հունվարի 27-ին կաթողիկոսը նրան կարգալույծ էր հռչակել։
ՀՀ գլխավոր դատատախազությունը փետրվարի 14-ին քրեական հետապնդում էր հարուցել Գարեգին Բ-ի նկատմամբ՝ Սարոյանի հետ կապված դատական ակտի կատարմանը խոչընդոտելու մեղադրանքով և արգելել վեհափառի ելքը Հայաստանից։
