Ճապոնիայի վարչապետ Սանաե Տակաիչին հանրային լայն քննարկումների ալիք է բարձրացրել՝ հայտարարելով, որ սովորաբար օրական ընդամենը 0–3 ժամ է քնում, իսկ 5 ժամը համարում է «շքեղություն»։
Նա նշել է, որ հանգստյան օրերն անցկացրել է պետական փաստաթղթեր ուսումնասիրելով, հազարավոր նամակներ վերլուծելով և տնային գործեր անելով։
Այս հայտարարությունը երկակի արձագանք է գտել․ ընդդիմադիր քաղաքական գործիչները մտահոգություն են հայտնել, որ քրոնիկ քնատությունը կարող է վատթարացնել որոշումներ կայացնելու ունակությունը և սպառնալ երկրի կառավարման որակին։
Մյուս կողմից՝ շատերը պաշտպանել են նրան՝ նշելով, որ որպես Ճապոնիայի առաջին կին վարչապետ՝ նա ստիպված է համատեղել պետական ծանր աշխատանքը տնային պարտականությունների հետ։
Այս պատմությունը կրկին ուշադրություն է հրավիրել ճապոնական աշխատանքային մշակույթի և «կարոշիի»՝ գերհոգնածությունից մահվան խնդրի վրա, որոնք շարունակում են արդիական մնալ երկրում՝ չնայած արտաժամյա աշխատանքի սահմանափակումներին։