Եմենի «Անսար Ալլահ» շարժումը, որն ավելի հայտնի է որպես հութիներ, հայտարարել է Սաուդյան Արաբիայի դեմ ծովային շրջափակում սահմանելու մասին։ Այս մասին հայտարարել է խմբավորման ռազմական խոսնակ Յահյա Սարին, Reuters-ի փոխանցմամբ:
Հութիների հայտարարության համաձայն՝ շրջափակումը սկսվել է և ներկայացվում է որպես «աչք՝ աչքի դիմաց» պատասխան քայլ։
Խմբավորումը Սաուդյան Արաբիային մեղադրում է Եմենի նկատմամբ երկարամյա շրջափակում իրականացնելու և Սանայի միջազգային օդանավակայանին հարված հասցնելու մեջ։
Հայտարարությունը հնչել է այն բանից հետո, երբ վերջին օրերին կրկին սրվել է լարվածությունը հութիների և Սաուդյան Արաբիայի միջև։ Միջազգային լրատվամիջոցները նշում են, որ քայլը կարող է վտանգի տակ դնել Բաբ էլ-Մանդեբի նեղուցով իրականացվող նավագնացությունը, որն աշխարհում կարևորագույն առևտրային երթուղիներից մեկն է։
Առայժմ Սաուդյան Արաբիայի իշխանությունները պաշտոնական արձագանք չեն հրապարակել։