Աստղագետները հայտնաբերել են մի բացառիկ էկզոմոլորակ, որի մթնոլորտից պարբերաբար հելիում է արտանետվում։ «Science» գիտական ամսագրում հրապարակված հետազոտության համաձայն՝ այս երևույթը կարող է վկայել մոլորակի մթնոլորտի գոյության, ինչպես նաև դրա մակերևույթին տաք օվկիանոսների հնարավոր առկայության մասին։
Խոսքը «LHS 1140b» քարքարոտ էկզոմոլորակի մասին է։ Գիտնականների տվյալներով՝ հելիումի արտահոսքը ցույց է տալիս, որ մոլորակի մյուս ցնդող նյութերը պահպանվում են մթնոլորտի ավելի ստորին շերտերում։ Սա համապատասխանում է գիտնականների մշակած մթնոլորտային կառուցվածքի մոդելներին։
Հետազոտության հեղինակները ենթադրում են, որ մթնոլորտի ստորին շերտերում կարող են առկա լինել նաև ազոտ և ածխաթթու գազ՝ ինչպես Երկրի դեպքում։ Եթե այս գազերը ստեղծում են բավարար ջերմոցային ազդեցություն, ապա մոլորակի մակերևույթի ջերմաստիճանը կարող է այնքան բարձր լինել, որ այնտեղ գոյություն ունենան հեղուկ ջրով օվկիանոսներ։
«LHS 1140b»-ը գտնվում է Երկրից մոտ 49 լուսատարի հեռավորության վրա՝ Կետի համաստեղությունում գտնվող «LHS 1140» կարմիր թզուկ աստղի շուրջ։
Հետաքրքիր է, որ Կետի համաստեղությունը հայտնի է նաև ռուսալեզու լսարանին՝ Վլադիմիր Վիսոցկու «Տաու Կետի հեռավոր համաստեղությունում» երգի շնորհիվ։ Սակայն հարկ է նշել, որ Տաու Կետի աստղն ու «LHS 1140»-ը տարբեր աստղեր են, որոնք պարզապես գտնվում են նույն համաստեղության սահմաններում։