Փոքր Վեդի գյուղի մանկապարտեզի դաստիարակի կողմից երեխայի նկատմամբ բռնության դեպքով նախաքննությունն ավարտվել է։ Դաստիարակի նկատմամբ հարուցվել է հանրային քրեական հետապնդում՝ անչափահասին ֆիզիկական ուժեղ ցավ կամ հոգեկան ուժեղ տառապանք պատճառելու հոդվածով։
Այս մասին հայտնում են ՀՀ քննչական կոմիտեից։
ՔԿ-ի փոխանցմամբ՝ նախաքննությամբ ձեռք բերված տվյալների համաձայն՝ դաստիարակը 2024 թվականի ապրիլ-մայիս ամիսներին մանկապարտեզի ննջարանում, երեխայի վարքագծին չհամակերպվելու պատճառով, նախ քաշքշել է նրան, ապա հարվածել գլխին, իսկ լացը դադարեցնելու նպատակով՝ ևս մեկ անգամ հարվածել։
Քրեական վարույթը մեղադրական եզրակացությամբ ուղարկվել է հսկող դատախազին։
Ծանուցում․ մեղադրվող անձը համարվում է անմեղ, քանի դեռ նրա մեղավորությունն ապացուցված չէ դատարանի՝ օրինական ուժի մեջ մտած դատավճռով։