Ռազմական փորձագետ Վահագն Սարոյանի ֆեյսբուքյան գրառումը․ «Իրավական պետությունում քրեական գործը պետք է ծառայի արդարությունը վերականգնելուն, ոչ թե քաղաքական մրցակցին մշտապես մեղադրյալի կարգավիճակում պահելուն։ Բայց հայկական իրականության մեջ այլ է, քրեական գործերը քաղաքական գործիք են մեկ հոգու կապրիզին ծառայեցնելու համար:
Ութ տարի է՝ Սերժ Սարգսյանի դեմ քրեական հետապնդումը չեն դադարեցնում օրվա պատասխանատուները, սակայն այդ գործերը կա՛մ կարճվում են, կա՛մ մեղադրանքներն են տապալվում, ուստի անընդհատ վերաթարմացվում են այլ մեղադրանքներ: Այսինքն՝ տեսնում են իրենց ուզած արդյունքը չկա, մեղադրանքի ձևակերպումն է փոխվում:
Սա այլևս արդարադատություն չէ։ Սա Նիկոլի ցանկություններին հագուրդ տալու քաղաքական նպատակով անընդհատ վերարտադրվող հետապնդման մեխանիզմ է՝ նպատակ ունենալով քաղաքական հակառակորդին մշտապես մեղադրյալի աթոռին պահել և հասարակության ուշադրությունը շեղել, իրական պրոբլեմներից, որոնք ավելի սարսափելի հետևանքներ են ենթադրում»: