Բրիտանական վերլուծական Opta ընկերության սուպերհամակարգիչը 2026 թվականի ֆուտբոլի աշխարհի առաջնության քառորդ եզրափակիչների մեկնարկից առաջ Արգենտինայի հավաքականին այլևս չի ներառում մրցաշարի հաղթողի գլխավոր երեք հավակնորդների թվում։ Այդ մասին հաղորդվում է ընկերության պաշտոնական կայքում։
Արգենտինայի հավաքականը ներկայում զբաղեցնում է չորրորդ տեղը։ Նրա՝ աշխարհի չեմպիոն դառնալու հավանականությունը գնահատվում է 15,9%։ Մինչև 1/8 եզրափակիչները Արգենտինան երկրորդ տեղում էր, իսկ հաղթելու հավանականությունը գնահատվում էր 16,32%։
Մրցաշարի գլխավոր ֆավորիտը շարունակում է մնալ Ֆրանսիայի հավաքականը՝ 27,62% հաղթելու հավանականությամբ։ Ընդ որում, նախորդ փուլից առաջ այդ ցուցանիշը կազմում էր 28,89%։ Ֆրանսիայի գլխավոր մրցակիցը, ըստ սուպերհամակարգչի, Իսպանիայի հավաքականն է, որի հաղթելու հավանականությունը զգալիորեն աճել է՝ 12,96%-ից հասնելով 21,54%-ի։
Լավագույն եռյակը եզրափակում է Անգլիայի հավաքականը՝ 17,06% հաղթելու հավանականությամբ։ Անգլիացիների շանսերը նախորդ փուլի համեմատ ավելի քան կրկնապատկվել են․ մինչ այդ դրանք գնահատվում էին 8,14%։
Սուպերհամակարգչի կանխատեսմամբ՝ աշխարհի առաջնությունում հաղթելու ամենաքիչ հավանականությունն ունեն Նորվեգիայի (6,50%), Մարոկկոյի (4,04%), Բելգիայի (3,86%) և Շվեյցարիայի (3,46%) հավաքականները։ Այս թիմերից յուրաքանչյուրի համար աշխարհի չեմպիոնի տիտղոսը կարող է դառնալ պատմության մեջ առաջինը։
2026 թվականի ֆուտբոլի աշխարհի առաջնությունն անցկացվում է ԱՄՆ-ում, Կանադայում և Մեքսիկայում։ Առաջին անգամ մրցաշարին մասնակցում են 48 հավաքականներ։
Առաջնությունն ավարտվելու է հուլիսի 19-ին։
Նանիկ Աղասյան