Ադրբեջանի նախագահ Իլհամ Ալիևն ընդունել է ԱՄՆ Սենատի արտաքին հարաբերությունների հանձնաժողովի անդամ և Եվրոպայի և տարածաշրջանային անվտանգության համագործակցության ենթահանձնաժողովի նախագահ սենատոր Սթիվ Դեյնսին:
Այս մասին հաղորդում է ադրբեջանական պետության ղեկավարի պաշտոնական կայքը:
Հանդիպման ժամանակ Ադրբեջանի պետության ղեկավարը նշել է, որ Դոնալդ Թրամփի՝ ԱՄՆ նախագահի պաշտոնում վերընտրվելուց ի վեր, համագործակցության և փոխադարձ վստահության վրա հիմնված ադրբեջանա-ամերիկյան հարաբերությունները հաջողությամբ զարգացել են և հասել ռազմավարական գործընկերության մակարդակի, ինչը մեծ նշանակություն ունի ինչպես Ադրբեջանի, այնպես էլ ամբողջ տարածաշրջանի համար։
Նախագահ Ալիևը գոհունակությամբ հիշել է ԱՄՆ փոխնախագահ Ջ.Դ. Վենսի այցը Ադրբեջան և ընդգծել այդ այցի ընթացքում ստորագրված Ադրբեջանի և Միացյալ Նահանգների կառավարությունների միջև ռազմավարական գործընկերության մասին համաձայնագրի կարևորությունը։ Ալիևը նշել է Դոնալդ Թրամփի հետ իր անձնական հարաբերությունների բարձր մակարդակը և ընդգծել Թրամփի հատուկ դերը Ադրբեջանի և Հայաստանի միջև խաղաղության օրակարգի առաջխաղացման գործում։