Ֆուտբոլային աշխարհի ուշադրության կենտրոնում է հայտնվել աննախադեպ իրավիճակ՝ կապված ԱՄՆ հավաքականի հարձակվող Ֆոլարին Բալոգունի կարմիր քարտի և դրա հետագա վերանայման հետ։ Սովորաբար աշխարհի առաջնությունում կարմիր քարտ ստացած ֆուտբոլիստը ավտոմատ կերպով բաց է թողնում հաջորդ հանդիպումը՝ առանց բացառությունների կամ բողոքարկման հնարավորության։ Սակայն այս անգամ ՖԻՖԱ-ի որոշումը փոխել է այդ «անվիճելի կանոնը»։ Բալոգունը, ով կարմիր քարտ էր ստացել Բոսնիա և Հերցեգովինայի դեմ 1/16 եզրափակիչ խաղում, այժմ կարող է մասնակցել Բելգիայի դեմ 1/8 եզրափակչին։ Նա ԱՄՆ թիմի լավագույն ռմբարկուն է՝ երեք գոլով։
ՖԻՖԱ-ն որևէ հստակ բացատրություն չի տվել որոշման վերաբերյալ, ինչը առաջացրել է բուռն քննադատություն։ Բելգիայի ֆուտբոլի ֆեդերացիան հայտարարել է, որ զարմացած է որոշումից՝ պնդելով, որ այն հակասում է մրցաշարի կանոններին։ Մեծ աղմուկ է առաջացրել նաև այն տեղեկությունը, ըստ որի՝ ԱՄՆ նախագահ Դոնալդ Թրամփը հեռախոսազրույց է ունեցել ՖԻՖԱ-ի նախագահ Ջանի Ինֆանտինոյի հետ՝ քննարկելով Բալոգունի որակազրկման հարցը։ Սա լրացուցիչ հարցեր է առաջացրել քաղաքական ազդեցության հնարավորության վերաբերյալ։