ԲՀԿ-ական Նաիրի Սարգսյանը խիստ բացասական է գնահատել ԲՀԿ առաջնորդ Գագիկ Ծառուկյանի շուրջ ծավալվող իրադարձությունները՝ դրանք որակելով քաղաքական ռեպրեսիաներ։
Նրա խոսքով՝ նախընտրական քարոզարշավի ընթացքում իշխանության կողմից հնչել են ԲՀԿ-ի դեմ բռնության կոչեր և սպառնալիքներ, այնուհետև, իր գնահատմամբ, տեղի է ունեցել «ձայների գողություն», իսկ Կենտրոնական ընտրական հանձնաժողովն ու Սահմանադրական դատարանը կատարել են իշխանության քաղաքական կամքը։
Հարցին, թե ինչ ճանապարհով պետք է դադարեցվեն այդ գործընթացները, նա պատասխանել է, որ այլընտրանքը իշխանափոխությունն է։
«Մեր բոլորի աչքի առաջ Նիկոլ Փաշինյանը վերածվում է փոքրիկ բռնապետի, և նրա գործողություններին հակազդելու միակ ճանապարհը իշխանափոխությունն է»,- նշել է նա։
Անդրադառնալով ընդդիմության կողմից պատգամավորական մանդատներ վերցնելուն՝ Սարգսյանն ասել է, որ չի կարող պնդել, թե դա ինքնին կհանգեցնի իշխանափոխության։
«Մարդիկ տարբեր ռազմավարություններ և պատկերացումներ ունեն։ Կարևորը վերջնական արդյունքն է՝ Նիկոլ Փաշինյանի և նրա իշխանության հեռացումը»,- հայտարարել է նա։
Սարգսյանը նաև պնդել է, որ Հայաստանում խախտված է իշխանությունների տարանջատման սկզբունքը, իսկ դատական համակարգը, իր գնահատմամբ, անկախ չէ։
«Սահմանադրական դատարանից մինչև առաջին ատյանի դատարաններ, բոլորը կատարում են Նիկոլ Փաշինյանի կամքը, և այսօր չկա որևէ անկախ մարմին, որը նրան պատասխանատվության կենթարկի»,- ասել է Նաիրի Սարգսյանը։