Եվրատլանտյան տարածաշրջանի համար սպառնալիքներն ու մարտահրավերները, Ուկրաինան և ՆԱՏՕ-ի հարավային թևը կլինեն հուլիսի 7-8-ը Անկարայում կայանալիք դաշինքի գագաթնաժողովի հիմնական թեմաների շարքում: Այս մասին հայտնել է Թուրքիայի նախագահի աշխատակազմի հաղորդակցության վարչության ղեկավար Բուրհանեթին Դուրանը։
«Գագաթնաժողովում համապարփակ մոտեցման հայեցակարգի շրջանակներում կգնահատվեն պաշտպանական բյուջեների ավելացման որոշման շրջանակներում ձեռնարկված քայլերը, ինչպես նաև դաշինքի ջանքերը զսպման և պաշտպանության ոլորտում։ Նաև առաջնորդների մակարդակով ռազմավարական համատեքստում մտքերի փոխանակում տեղի կունենա Եվրատլանտյան տարածաշրջանի համար սպառնալիքների, ռիսկերի և մարտահրավերների թեմաներով։ Կքննարկվեն Ուկրաինայում տիրող իրավիճակը և ՆԱՏՕ-ի հարավային թևում տեղի ունեցող վերջին զարգացումները»,- գրել է Դուրանը X-ում։
Դաշնակից երկրների պետությունների և կառավարությունների ղեկավարների մակարդակով Հյուսիսատլանտյան խորհրդի նիստը, որը կանցկացնի Թուրքիայի նախագահ Ռեջեփ Թայիփ Էրդողանը, կկայանա հուլիսի 8-ին։ Հուլիսի 7-ին Թուրքիայի առաջնորդը և նրա կինը՝ Էմինե Էրդողանը, նախագահական համալիրում ընդունելության և ընթրիքի ժամանակ կդիմավորեն պետությունների և կառավարությունների ղեկավարներին ու նրանց կանանց։ Էրդողանի ծրագրում նաև մեծ քանակությամբ երկկողմ հանդիպումներ կան ՆԱՏՕ-ի երկրների պատվիրակությունների ղեկավարների հետ: Կժամանի նաև ԱՄՆ նախագահ Դոնալդ Թրամփը, որի համար Էրդողանի վարչակազմը երկկողմ հանդիպումից առաջ պատրաստել է բարձրագույն կարգի դիմավորման արարողություն։
Ընդհանուր առմամբ, ինչպես հայտնել է վարչությունը, գագաթնաժողովին պետությունների և կառավարությունների ղեկավարների մակարդակով կներկայացվի 32 երկիր, կժամանի մոտ 100 նախարար: Անվտանգությանը հետևում է ավելի քան 56 հազար ուժային: