Իրանի հետ բանակցությունների ընթացքում ԱՄՆ պաշտոնյաները կասկածել են, որ Իսրայելը մահափորձ է ծրագրում Թեհրանի գլխավոր բանակցողների՝ արտգործնախարար Աբբաս Արաղչիի և խորհրդարանի խոսնակ Մոհամմադ Ղալիբաֆի դեմ, The New York Times -ին հայտնել են տեղեկացված աղբյուրները:
Նրանց տվյալներով՝ Վաշինգտոնը վախենում էր, որ այդ անձանց սպանությունը կխաթարի Թեհրանի հետ երկխոսությունը և զգուշացրել էր Իրանի իշխանություններին հնարավոր մահափորձի մասին՝ անվտանգությունն ամրապնդելու համար։
Ապրիլին Ղալիբաֆը պետք է հանդիպեր ԱՄՆ փոխնախագահ Ջ.Դ. Վենսի հետ Իսլամաբադում: Մահափորձի սպառնալիքի պատճառով իրանական ինքնաթիռը հանդիպումից հանդիպում ուղեկցվել է պակիստանյան կործանիչներով:
Սակայն, վերադարձի չվերթի ժամանակ, ըստ NYT-ի աղբյուրների, իրանական հետախուզությունը որսացել է Իսրայելի մոտալուտ հարձակման մասին տվյալներ, և երկու իսրայելական կործանիչներ արդեն մտած են եղել Իրանի օդային տարածք:
Արդյունքում, իրանական ինքնաթիռը արտակարգ վայրէջք է կատարել Մաշհադ քաղաքում, որից հետո պատվիրակությունը ցամաքով մեկնել է Թեհրան: