27 հունիսի 2026 – 12:36 AMT
PanARMENIAN.Net – ԱՄՆ դաշնային դատարանը պարտավորեցրել է Արդարադատության նախարարությանը ներկայացնել Ջեֆրի Էփշտեյնի գործին վերաբերող մի շարք փաստաթղթերի չխմբագրված տարբերակները կամ հիմնավորել, թե ինչու դրանք չեն կարող հրապարակվել։
Գերատեսչությունը մինչև հուլիսի 2-ը պետք է կամ գաղտնազերծի այդ տեղեկությունները, կամ բացատրի, թե ինչու չի կարող դա անել։ Այդպիսի որոշում է կայացրել շրջանային դատավոր Էմեթ Սալիվանը՝ հինգշաբթի՝ հունիսի 25-ին, հայտնում է Deutsche Welle-ն:
Որոշումն ընդունվել է անկախ լրագրող Քեթի Ֆանի հայցի հիման վրա, որը ապրիլին մեղադրել էր ԱՄՆ Արդարադատության նախարարությանը և գլխավոր դատախազի պաշտոնակատար Թոդ Բլանշին տեղեկություններն անհիմն կերպով գաղտնի պահելու մեջ։ Դատարանը պաշտպանել է նրա դիրքորոշումը։
Իր որոշման մեջ Սալիվանը նշել է, որ ԱՄՆ նախագահ Դոնալդ Թրամփի վարչակազմը խախտել է «Էփշտեյնի գործի նյութերի թափանցիկության մասին օրենքի» պահանջները։ Կոնգրեսի կողմից 2025 թվականի նոյեմբերին ընդունված այդ օրենքը պարտավորեցրել էր Արդարադատության նախարարությանը 30 օրվա ընթացքում հրապարակել գործին վերաբերող բոլոր չգաղտնագրված նյութերը՝ թույլատրելով փաստաթղթերի խմբագրումը միայն զոհերի պաշտպանության, ընթացիկ քննությունների և ազգային անվտանգության շահերի ապահովման նպատակով։
Դատարանի որոշմամբ ընդգրկված նյութերի թվում են նաև այն աղջկա հարցաքննության արձանագրությունները, որը Թրամփին մեղադրել է բռնության մեջ։ Արդարադատության նախարարությունը հրապարակել է այդ հարցաքննությունների վերաբերյալ հաշվետվությունները, սակայն ոչ՝ բուն արձանագրությունները։ Սպիտակ տան ղեկավարը հերքում է այդ մեղադրանքները։ Բացի այդ, նախարարությանը հանձնարարել են հրապարակել որոշ էլեկտրոնային նամակների ուղարկողների և ստացողների անունները, ինչպես նաև նախնական մեղադրական եզրակացության մեջ հիշատակված Էփշտեյնի ենթադրյալ հանցակիցների ինքնությունները։
Ամերիկացի ֆինանսիստ Ջեֆրի Էփշտեյնը 2008-2009 թվականներին պատիժ է կրել մարմնավաճառության կազմակերպման համար։ 2019 թվականի հուլիսի 6-ին նա ձերբակալվել է անչափահասներին մարմնավաճառությամբ զբաղվելու հարկադրելու մեղադրանքով, իսկ նույն թվականի օգոստոսի 10-ին նրան կախված են գտել Մանհեթենի բանտի խցում, որտեղ նա սպասում էր դատավարությանը։ 2025 թվականի դեկտեմբերին հրապարակվել է Էփշտեյնի գործին վերաբերող փաստաթղթերի առաջին փաթեթը։
2026 թվականի հունվարի 30-ին ԱՄՆ Արդարադատության նախարարությունը հրապարակել է «Էփշտեյնի գործի» ևս ավելի քան 3 միլիոն էջ նյութ, ինչպես նաև գործին վերաբերող 2000 տեսագրություն և 180 հազար այլ պատկեր։
Ավելի վաղ հրապարակված նյութերն արդեն բացահայտել են Էփշտեյնի կապերը մի շարք հայտնի անձանց հետ, այդ թվում՝ բրիտանացի արքայազն Էնդրյուի, որը դրա հետևանքով զրկվել է իր տիտղոսից։ Բացի այդ, JPMorgan բանկը զոհերի հետ հաշտության համաձայնագրի շրջանակում վճարել է 290 միլիոն դոլար, քանի որ երկար տարիներ Էփշտեյնին սպասարկել է որպես հաճախորդի։ ԱՄՆ Արդարադատության նախարարության տվյալներով՝ գործի նյութերում նույնականացվել է ավելի քան 1200 զոհ։