Ադրբեջանի և Թուրքիայի արտաքին գործերի նախարարներ Ջեյհուն Բայրամովը և Հաքան Ֆիդանը հեռախոսազրույցի ընթացքում քննարկել են դաշնակցային հարաբերությունները և միջազգային ու տարածաշրջանային հարթակներում համագործակցությունը, հաղորդում է Ադրբեջանի արտաքին գործերի նախարարության մամուլի ծառայությունը։
«Հեռախոսազրույցի ընթացքում քննարկվել են Ադրբեջանի և Թուրքիայի միջև դաշնակցային հարաբերություններից բխող հարցեր, երկու երկրների ռազմավարական համագործակցության օրակարգը, ինչպես նաև միջազգային ու տարածաշրջանային կազմակերպությունների շրջանակներում փոխգործակցությունն ու համակարգումը», – ասվում է հայտարարության մեջ։
Հայտարարության մեջ նշվում է, որ նախարարները ընդգծել են երկու երկրների միջև քաղաքական երկխոսության և փոխադարձ աջակցության բարձր մակարդակը և ընդգծել են փոխադարձ հետաքրքրություն ներկայացնող բոլոր ոլորտներում սերտ համագործակցության շարունակականության կարևորությունը։
Կողմերը նաև մտքեր են փոխանակել տարածաշրջանային անվտանգության, հետկոնֆլիկտային իրավիճակի և տարածաշրջանային խաղաղության ու կայունության ապահովման ջանքերի վերաբերյալ։