Ֆուտբոլի միջազգային ֆեդերացիան (ՖԻՖԱ) որոշում է կայացրել թույլատրել Ռուսաստանի պատանեկան՝ մինչև 15 տարեկանների տղաների և աղջիկների հավաքականներին մասնակցել աշխարհի առաջնությանը։ Այս մասին հայտնում է կազմակերպության մամուլի ծառայությունը։ Մրցաշարը կանցկացվի հոկտեմբերի 22-ից 31-ը՝ Ադրբեջանում։
ՖԻՖԱ-ի հայտարարության համաձայն՝ խորհուրդը հաստատել է մինչև 15 տարեկանների մրցաշարի անցկացումը, իսկ խորհրդի բյուրոն որոշել է 2026 թվականի աշխարհի առաջնությունն ու ՖԻՖԱ-ի փառատոնը կազմակերպել Ադրբեջանում։ Այս մրցաշարին կարող են մասնակցել ՖԻՖԱ-ի անդամ բոլոր ասոցիացիաների թիմերը։
Հարկ է նշել, որ 2022 թվականի փետրվարի վերջից Ռուսաստանի բոլոր ֆուտբոլային հավաքականներն ու ակումբները միջազգային մրցաշարերից հեռացված էին Ուկրաինայում ռազմական գործողությունների պատճառով։
Այս որոշումը բացառիկ նախադեպ է ռուսական ֆուտբոլի համար՝ վերոնշյալ ժամանակահատվածից ի վեր։