ՀՀ ներքին գործերի նախարարի 2025 թվականի սեպտեմբերի 20-ի թիվ 5-Ն հրամանով սահմանված է փրկարարական ծառայության անցնելու և պաշտոնի նշանակվելու կարգը։ Սակայն շատերը չգիտեն, որ Իրավական ակտերի նախագծերի հրապարակման միասնական հարթակում՝ e-draft.am-ում, հանրային քննարկման է ներկայացվել ՆԳՆ-ի հրամանի նախագիծ, որով առաջարկվում է այդ հրամանի հավելվածում կատարել լրացում և փոփոխություններ։
Ինչպես տեղեկացնում է Iravaban.net-ը, փոփոխությունները վերաբերում են ժամանակավոր պաշտոն զբաղեցնելու, վերապատրաստման, փրկարարի որակավորման և ավարտական քննաշրջանի կարգավորումներին։
Ինչու է առաջարկվում փոփոխությունը
Ըստ հիմնավորման՝ նախագիծը պայմանավորված է փրկարարական ծառայության թափուր հաստիքների համալրման ընթացքում ի հայտ եկած խոչընդոտների ու թերությունների վերացման անհրաժեշտությամբ։ Մասնավորապես՝ ներկայումս առկա չէ ժամանակավոր պաշտոնի նշանակվող անձանց համար կարգավորում, կա հակասություն կադրերի ռեզերվում գտնվող ծառայողների վերապատրաստման մասով, առաջին անգամ պաշտոնի նշանակվողի «Փրկարար» որակավորման գործող կարգը հակասում է «Փրկարար ուժերի և փրկարարի կարգավիճակի մասին» օրենքին, իսկ անբավարար գնահատական ստացած անձանց վերահանձնման հնարավորություն չի տրվում։
Ժամանակավոր պաշտոն զբաղեցնելու վերապատրաստումը
Նախագծով հավելվածի 17-րդ կետը լրացվում է նոր նախադասությամբ, ըստ որի՝ կարճաժամկետ վերապատրաստման ենթակա են նաև երեխայի խնամքի արձակուրդում գտնվող ծառայողի ժամանակավոր թափուր (մինչև հիմնական ծառայողի՝ ծառայողական պարտականությունների կատարմանն անցնելը) պաշտոնին հավակնող քաղաքացիները (ծառայողները)։
Կադրերի ռեզերվի ծառայողների վերապատրաստումը
Նախագծով նոր խմբագրությամբ են շարադրվում 20-րդ կետի 3-րդ և 4-րդ ենթակետերը։ Ըստ դրա՝ չեն վերապատրաստվում սահմանված կարգով հավասարազոր և նույն բնույթի (ոլորտի) այլ պաշտոնի փոխադրվող ծառայողները, ինչպես նաև կադրերի ռեզերվում գտնվող ծառայողները՝ բացառությամբ այն դեպքի, երբ նրանք նշանակվում են ռեզերվում գրանցվելուց առաջ զբաղեցրած պաշտոնից առաջխաղացման կարգով։
Փրկարարի որակավորումը
Նոր խմբագրությամբ շարադրվում է 26-րդ կետը, ըստ որի՝ առաջին անգամ փրկարարական ծառայության անցնող քաղաքացին նախքան պաշտոնի նշանակվելը անցնում է որակավորում՝ «Փրկարար ուժերի և փրկարարի կարգավիճակի մասին» օրենքով սահմանված կարգով, ինչը ներառվում է ավարտական քննաշրջանի մեջ։ Միաժամանակ ուժը կորցրած է ճանաչվում 27-րդ կետը։
Քննությունը վերահանձնելը
Նոր խմբագրությամբ շարադրվող 30-րդ կետով սահմանվում է, որ ավարտական քննաշրջանում անբավարար գնահատական ստացած քաղաքացիներին (ծառայողներին) 5 աշխատանքային օրվա ընթացքում տրվում է վերահանձնման հնարավորություն։ Վերահանձնումից ևս անբավարար ստանալու դեպքում քաղաքացիները զրկվում են տվյալ պաշտոնում նշանակվելու, իսկ ծառայողները՝ այդ պաշտոնում առաջխաղացման կարգով նշանակվելու հնարավորությունից։
Հանրային քննարկումը
Նախագիծը մշակվել է ՀՀ ներքին գործերի նախարարության կողմից (ստորագրող՝ նախարար Ա. Սարգսյան) և հանրային քննարկման է ներկայացվել 2026 թվականի հունիսի 18-ից հուլիսի 3-ն ընկած ժամանակահատվածում։ Ըստ հիմնավորման՝ դրա ընդունումը պետական բյուջեում եկամուտների կամ ծախսերի փոփոխություն չի առաջացնում։ Քանի որ խոսքը դեռ նախագծի մասին է, վերջնական կարգավորումը կախված է դրա ընդունումից։
Ի՞նչ է նշանակում
Ամփոփելով՝ պետք է նշել, որ նախագծի ընդունման դեպքում երեխայի խնամքի արձակուրդում գտնվող ծառայողի փոխարեն ժամանակավոր պաշտոն զբաղեցնելու հավակնորդները կանցնեն կարճաժամկետ վերապատրաստում, կհստակեցվեն կադրերի ռեզերվի ծառայողների վերապատրաստման դեպքերը, փրկարարի որակավորման կարգը կհամապատասխանեցվի «Փրկարար ուժերի և փրկարարի կարգավիճակի մասին» օրենքին, իսկ ավարտական քննաշրջանում անբավարար ստացած անձինք հնարավորություն կունենան 5 աշխատանքային օրվա ընթացքում վերահանձնելու քննությունը , – տեղեկացնում է Iravaban.net-ը։
Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։