CNN-ը հրապարակել է ԱՄՆ-ի և Իրանի միջև կնքված 14 կետից բաղկացած փոխըմբռնման հուշագրի ամբողջական տեքստը, որը, ըստ լուրերի, կոչվում է «Իսլամաբադի հուշագիր»։
Փաստաթուղթը նախատեսում է Հորմուզի նեղուցի բացում միջազգային առևտրի համար, Իրանի դեմ նավթային և ֆինանսական պատժամիջոցների աստիճանական վերացում, ինչպես նաև սահմանում է իրանական միջուկային ծրագրի շուրջ ապագա բանակցությունների շրջանակը։
Հաղորդվում է, որ կողմերի կողմից հուշագրի ստորագրումը նախատեսված է հաջորդ շաբաթ Շվեյցարիայում։
Ստորև ներկայացված են հուշագրի 14 կետերը.
1 Միացյալ Նահանգները, Իրանի Իսլամական Հանրապետությունը և ներկայիս հակամարտության մեջ նրանց դաշնակիցները ստորագրում են այս փոխըմբռնման հուշագիրը՝ բոլոր ճակատներում, այդ թվում՝ Լիբանանում, ռազմական գործողությունների անհապաղ և մշտական դադարեցման հասնելու համար։ Կողմերը պարտավորվում են չսկսել ռազմական գործողություններ միմյանց դեմ, զերծ մնալ ուժի սպառնալիքից կամ կիրառումից և պահպանել Լիբանանի տարածքային ամբողջականությունն ու ինքնիշխանությունը։ Այս դրույթները կվերահաստատվեն վերջնական համաձայնագրում։
2 Միացյալ Նահանգները և Իրանը պարտավորվում են հարգել միմյանց ինքնիշխանությունն ու տարածքային ամբողջականությունը և չմիջամտել միմյանց ներքին գործերին։
3 Կողմերը պարտավորվում են ավարտել վերջնական համաձայնագրի շուրջ բանակցությունները առավելագույնը 60 օրվա ընթացքում՝ փոխադարձ համաձայնությամբ երկարաձգման հնարավորությամբ։
4 Ստորագրումից անմիջապես հետո Միացյալ Նահանգները կսկսի վերացնել Իրանի շուրջ ծովային շրջափակումը և բոլոր խոչընդոտները՝ այն ամբողջությամբ վերացնելով 30 օրվա ընթացքում: Այս ընթացքում նավագնացությունը կվերականգնվի պատերազմից առաջ եղած մակարդակին: Միացյալ Նահանգները նաև պարտավորվում է իր ուժերը դուրս բերել Իրանի անմիջական շրջանից վերջնական համաձայնագրի կնքումից հետո 30 օրվա ընթացքում:
5 Իրանը կապահովի առևտրային նավերի անվտանգ և անմաքս անցումը Պարսից ծոցով և Օմանի ծովով։ Այս ռեժիմը կգործի 60 օրվա ընթացքում։ Լիարժեք կարգավորումը սպասվում է 30 օրվա ընթացքում՝ ականազերծման և խոչընդոտների վերացման պայմանով։
6 Միացյալ Նահանգները պարտավորվում է համագործակցել տարածաշրջանային գործընկերների հետ՝ Իրանի վերակառուցման և տնտեսական զարգացման համար առնվազն 300 միլիարդ դոլարի ֆինանսական ծրագիր մշակելու համար։
7 Միացյալ Նահանգները պարտավորվում է աստիճանաբար վերացնել Իրանի դեմ բոլոր պատժամիջոցները, ներառյալ ՄԱԿ-ի և Ատոմային էներգիայի միջազգային գործակալության պատժամիջոցները, ինչպես նաև սեփական առաջնային և երկրորդային պատժամիջոցները։
8 Իրանը հաստատում է, որ չի ձգտի միջուկային զենք մշակել: Հարստացված նյութերի հարցը կլուծվի Ատոմային էներգիայի միջազգային գործակալության (ԱԷՄԳ) հսկողության ներքո:
9 Մինչև վերջնական համաձայնության հասնելը, կողմերը կպահպանեն ստատուս քվոն. Իրանը չի փոխի իր միջուկային ծրագիրը, իսկ ԱՄՆ-ն չի կիրառի նոր պատժամիջոցներ կամ չի մեծացնի իր ռազմական ներկայությունը։
10 ԱՄՆ-ն իրանական նավթի արտահանման և ֆինանսական գործարքների համար բացառություններ է տրամադրում մինչև պատժամիջոցների լիակատար վերացումը։
11 Միացյալ Նահանգները պարտավորվում է ապաշրջափակել Իրանի սառեցված և սահմանափակված ակտիվները։
12 Կողմերը ստեղծում են հատուկ մեխանիզմ՝ համաձայնագրի կատարումը վերահսկելու համար։
13 Հիմնական կետերի իրականացումից հետո կողմերը սկսում են բանակցություններ վերջնական համաձայնագրի մնացած դրույթների շուրջ։
14 Վերջնական համաձայնագիրը կհաստատվի ՄԱԿ-ի Անվտանգության խորհրդի պարտադիր բանաձևով։