Լրագրող Ոսկան Սարգսյանի ֆեյսբուքյան գրառումը․ «Վերցնե՞լ, թե՞ չվերցնել մանդատները.
Երեկ ինձ զանգահարեց քաղաքականությունից իրազեկ, լավ հասկացող ծանոթս ու իր տեսակետը ներկայացրեց հունիսի 7-ի ընտրություններից հետո ընդդիմության կողմից պատգամավորական մանդատները վերցնել-չվերցնելու վերաբերյալ։ Նրա խոսքով՝ ընդդիմության կողմից Աժ մանդատները չվերցնելու պարագայում Նիկոլ Փաշինյանը ԱԺ-ում չունենալով ընդդիմություն՝ ցանկացած հարց միանձնյա, առանց որևէ մեկի հետ հաշվի նստելու է լուծելու։ Փաշինյանն արդեն ստացել է ԱՄՆ-ի, Եվրոմիության շնորհավորանքները, որոնք դրանով ճանաչել են նրա իշխանության լեգիտիմությունը։ Ընդդիմությունն ԱԺ-ում լինելու դեպքում Փաշինյանին զրկելու է սահմանադրական մեծամասնություն, ձայների 3/5-ը ունենալու հնարավորությունից, սահմանափակելու է նրա հնարավորությունները մի շարք առանցքային պաշտոնյաների՝ գլխավոր դատախազին, սահմանադրական և վճռաբեկ դատարանների դատավորներին, ԿԸՀ-ի նախագահին, կենտրոնական բանկի նախագահին և այլ բարձրաստիճան պաշտոնյաներին միանձնյա նշանակելու։ ԱԺ-ում ընդդիմությունը կարող է միասնական, համակարգված պայքարով թույլ չտալ Ադրբեջանին անկլավների հանձնումը, նոր սահմանադրության ընդունումը և Անկախության հռչակագրի չեղարկումը։ Ծանոթս ասաց, որ ընդդիմության կողմից պատգամավորական մանդատները վերցնելը չպետք է նշանակի ընդդիմության կողմից փողոցային պայքարից ընդհանրապես հրաժարում, գործունեության այդ ձևերը պետք է իրար լրացնեն, ընդդիմությունը պետք է գործի՝ ըստ իրավիճակի նպատակարմարության»։