Հայաստանի վարչապետ Նիկոլ Փաշինյանը հայտարարել է քաղաքական հանձնառության մասին, ըստ որի՝ Հայաստանից գյուղմթերքը Եվրոպական միություն կարտահանվի առանց մաքսատուրքի։ Այս մասին նա ասել է ԱԺ-ում 2025 թվականի պետբյուջեի կատարողականի նախնական քննարկմանը։
«Մենք փաստացի ունենք հստակ քաղաքական հանձնառություն, որ Հայաստանի Հանրապետությունից գյուղմթերքը ԵՄ կարտահանվի առանց մաքսատուրքի և առաջիկայում սա կդառնա իրողություն»,- ասել է Փաշինյանը։
Վարչապետը հստակ ժամկետներ չի նշել, թե երբ կսկսվի ԵՄ-ի հետ պայմանավորվածությունների գործնական իրականացումը։
Փաշինյանը հավելել է, որ ԵՄ շուկա դուրս գալը կպահանջի որակի, փաթեթավորման և այլ չափանիշների համապատասխանեցում։
«Իհարկե նաև փաթեթավորման և այլ նորություններ ու նորամուծություններ կլինեն»,- նշել է նա։
Նրա խոսքով՝ կառավարությունը նախատեսել է գյուղատնտեսական լոգիստիկ կենտրոնների ստեղծում, որտեղ հնարավոր կլինի նաև իրականացնել ապրանքների տեսակավորում։
«Մենք նաև պլանավորել ենք գյուղատնտեսական լոգիստիկ կենտրոնների ստեղծում, որի շրջանակում չի բացառվում նաև ապրանքների տեսակավորումը»,- ասել է Փաշինյանը։
Ավելի վաղ գյուղատնտեսական լոգիստիկ կենտրոնների ստեղծման մասին հայտարարել էին Փաշինյանի ընդդիմախոսները՝ «Ուժեղ Հայաստան» դաշինքը, որը առաջարկել էր նման կենտրոններ ստեղծել երկրի տարբեր հատվածներում՝ գյուղմթերքը երկար պահելու և արտահանելու, այդ թվում՝ ոչ սեզոնային շրջանում իրացնելու նպատակով։
Փաշինյանը նաև հայտարարել է, որ հայաստանյան ծաղկի արտադրողները հասանելիություն կունենան Նիդերլանդների վարդերի շուկային։ Նրա խոսքով՝ այդ շուկա մուտքը փաստացի հնարավորություն է տալիս դուրս գալ համաշխարհային ծաղկի շուկա։
«Մեծ իրադարձություն եմ համարում Նիդերլանդների թագավորությունում վարդերի շուկայի հասանելիությունը Հայաստանի, հայաստանյան արտադրողների համար, որովհետև այն ծաղկի արտադրողները, որոնք հասանելիություն ունեն Նիդերլանդների թագավորության շուկային, հասանելիություն ունեն ամբողջ աշխարհին»,- նշել է վարչապետը։
Նա չի հստակեցրել մատակարարումների մեկնարկի հնարավոր ժամկետները և այն պահանջները, որոնք պետք է կատարեն հայաստանյան արտադրողները Նիդերլանդների շուկա դուրս գալու համար։
Փաշինյանի խոսքով՝ Նիդերլանդների վարդերի շուկա դուրս գալու հարցը քննարկվել է դեռ մեկուկես ամիս առաջ՝ Ֆանտան գյուղում հերթական ջերմոցի բացման ժամանակ։
«Ինչպես ասում են շաբաթը ուրբաթից շուտ եկավ, հարգելի գործընկերներ և մենք հիմա հասանելիություն ունենք ոչ միայն Նիդերլանդների վարդի շուկային»,- հայտարարել է նա՝ չնշելով ժամկետները։
Հայ ծաղկագործները հայտարարել են ճգնաժամի մասին՝ հայկական ծաղիկների ներմուծման ռուսական արգելքից հետո։ Մոսկվան որոշումը բացատրել է ֆիտոսանիտարական խնդիրներով, սակայն սահմանափակումները համընկել են հայ-ռուսական հարաբերությունների վատթարացման հետ։ Իշխանությունները խոստացել են իրացման նոր շուկաներ և փոխհատուցում այն արտադրանքի համար, որը չի արտահանվել։
Բիզնեսի ներկայացուցիչներն ընդունում են, որ կարճաժամկետ հեռանկարում ռուսական շուկային համարժեք փոխարինում չկա։ Նրանցից շատերը հույս ունեն, որ խորհրդարանական ընտրություններից հետո իրավիճակը կհստականա, և իշխանությունները կկարողանան հասնել առևտրային մատակարարումների վերականգնմանը։
Ռոսսելխոզնադզորը մայիսի 22-ից ժամանակավոր սահմանափակումներ է սահմանել Հայաստանից ծաղիկների ներմուծման վրա։ Փաշինյանը հայտարարել է , որ Հայաստանն արդեն սկսել է արտահանումը նոր ուղղություններով, այդ թվում՝ վարդերի և այլ արտադրանքի փորձնական խմբաքանակներ։ Նա ընդգծել է, որ Երևանը մտադիր չէ վեճի մեջ մտնել ռուս գործընկերների հետ և փորձելու է հարցերը կարգավորել աշխատանքային կարգով։ Եվրամիությունը նույնպես խոստացել է Հայաստանին հատկացնել 50 մլն եվրո՝ ճգնաժամը հաղթահարելու համար։ Եվրահանձնաժողովի նախագահ Ուրսուլա ֆոն դեր Լայենը հայտարարել է, որ հայկական 11 հազար ծաղիկների առաջին խմբաքանակն արդեն ուղարկվել է Լիտվա։
