ԿԸՀ նախագահը ներկայացրել է ԱԺ ընտրությունների քվեարկության ընթացիկ իրավիճակը

ԵՐԵՎԱՆ, 7 հունիսի․/ԱՌԿԱ/․ ԿԸՀ նախագահ Վահագն Հովակիմյանը ներկայացրել է ԱԺ ընտրությունների քվեարկության ընթացիկ իրավիճակը։

«Բոլոր ընտրատեղամասերը առավոտյան ժամը 07.00-ից սկսել են իրենց աշխատանքները, իսկ ժամը 08.00-ից բոլոր ընտրատեղամասերը սկսել են ընդունել ընտրողներին: Ժամը 08.00-ի դրությամբ գործընթացն ընթանում է բնականոն: Այս ընթացքում ինչ-որ տեխնիկական խնդիրներ են եղել, որոնք հընթացս արագ լուծվում են», – նշել է Հովակիմյանը։ 

Նրա խոսքով, ժամը 8–ի դրությամբ բացականեր են եղել 42 005 տեղամասերից 48–ում։ Ընդամենը 3 դեպքերում 2 նախագահ և մեկ քարտուղար է բացակա եղել։ Ընտրական օրենսգիրքը հնարավորություն է տալիս, որ եթե ընտրական հանձնաժողովից որևէ մեկը բացակա է, միևնույն է գործընթացը շարունակվում է։ 

Ընտրությունների մասին

Հայաստանում մեկնարկել են 9-րդ գումարման Ազգային ժողովի հերթական ընտրությունները։ Տեղական ժամանակով ժամը 08:00-ից հանրապետության ողջ տարածքում բացվել է 2005 ընտրատեղամաս։

ԿԸՀ տվյալներով՝ ընտրողների ռեգիստրում գրանցված է 2 միլիոն 505 հազար 102 մարդ։

Ընտրություններին մասնակցում է 18 քաղաքական ուժ՝ 16 կուսակցություն և 2 դաշինք։

Կուսակցությունների թվում են․

• Ռեֆորմիստների կուսակցություն

• «Բոլորին դեմ եմ» կուսակցություն

• Հայաստանի շնորհապետական կուսակցություն

• «Նոր ուժ» կուսակցություն

• «Միասնության թևեր» կուսակցություն

• «Բարգավաճ Հայաստան» կուսակցություն

• «Ազգային-ժողովրդավարական բևեռ» կուսակցություն

• «Քոչարի ազգային վերածնունդ և ազգի զարթոնք» կուսակցություն

• «Հայ ազգային կոնգրես» կուսակցություն

• «Հանրապետություն» կուսակցություն

• Քրիստոնեա-ժողովրդավարական կուսակցություն

• Ժողովրդավարական համախմբում» կուսակցություն

• «Դեմոկրատիա օրենք, կարգապահություն» կուսակցություն (ԴՕԿ)

• «Քաղաքացիական պայմանագիր» կուսակցություն

• «Հանուն Հանրապետության» կուսակցություն

• «Լուսավոր Հայաստան» կուսակցություն

Մասնակցում է նաև երկու դաշինք՝ «Ուժեղ Հայաստան»-ը և «Հայաստան»-ը։