Արտաքին գործերի նախարար Արարատ Միրզոյանը հայտարարել է, որ Հայաստանի համար խաղաղությունն արդեն ոչ թե գաղափար է, այլ փաստաթղթավորված իրականություն, որն իր հետ բերել է նոր հնարավորություններ։
Նրա խոսքով՝ խաղաղությունն ունի իր «ծննդյան վկայականը» և ամրագրված է համապատասխան փաստաթղթերով՝ Հայաստանին ընձեռելով ապաշրջափակման և լոգիստիկ զարգացման հնարավորություններ։
Միրզոյանը նշել է, որ «ԹՐԻՓՓ»-ն արդեն միջպետական մակարդակով կնքված համաձայնագիր է, որի արդյունքում Հայաստանը, նրա ձևակերպմամբ, «փակուղուց և կույր աղիքից» վերածվում է «Խաղաղության խաչմերուկի» և տարածաշրջանային իրական կամրջի։
ԱԳ նախարարը նաև անդրադարձել է ներքաղաքական զարգացումներին՝ քննադատելով այն ուժերին, որոնք, ըստ նրա, ձգտել են ձախողել երկրի առաջընթացը։
«Բորենիների ոհմակն ամեն ինչ արել է, որ մենք ձախողենք և ատամները սրած սպասել է, որ մեր ընկնելու պահին հոշոտի մեր ժողովրդավարությունը, ազատությունը, պետությունն ու պետականությունը»,- հայտարարել է նա։
Միրզոյանի խոսքով՝ այդ ուժերը փորձում են «վերջին կռիվը» տալ, սակայն դրա արդյունքը կանխորոշված է, քանի որ Հայաստանի քաղաքացիները գիտակցում են ինքնիշխանության և ազատության արժեքը։
«Ձեզանից յուրաքանչյուրն անհատապես, իր մեջ խորապես գիտակցելով բոլոր հալածանքները, տարիներ առաջ որոշել է, որ չի հանձնելու Հայաստանը, մեր ինքնիշխանությունը և մեր ազատությունը»,- ընդգծել է Արտաքին գործերի նախարարը։