Փաշինյանը հայտարարել է արտահանողներին աջակցելու միջոցառումների մասին՝ ՌԴ-ի կողմից սահմանափակումների ֆոնին

ԵՐԵՎԱՆ, 2 հունիսի․/ԱՌԿԱ/․ ՀՀ վարչապետ Նիկոլ Փաշինյանը հայտարարել է, որ կառավարությունն աջակցություն կցուցաբերի արտահանողներին՝ Ռուսաստանի կողմից սահմանափակումների ֆոնին։

«Արտահանման անարդար խոչընդոտների դեպքում կառավարությունը կիրականացնի սուբսիդավորման և աջակցության ծրագրեր, ինչպես նաև կօգնի վնասներ կրած արտադրողներին գտնել նոր շուկաներ»,- ասել է Փաշինյանը Գեղարքունիքի մարզի Լճաշեն գյուղի բնակիչների հետ նախընտրական հանդիպման ժամանակ։

Նրա խոսքով՝ խոսքն այն դեպքերի մասին է, երբ սահմանափակումները կապված չեն արտադրանքի որակի հետ։ Միևնույն ժամանակ, ինչպես նշել է վարչապետը, լինում են իրավիճակներ, երբ արտահանվող արտադրանքը չի համապատասխանում սահմանված չափանիշներին։

«Մենք չենք կարող անորակ արտադրանք արտահանել՝ ի վնաս մեր ինքնիշխանության և պետական շահերի։ Մենք կօգնենք այդ գործարարներին հասցնել արտադրանքը որակի նոր չափանիշների»,- ընդգծել է Փաշինյանը։

Վարչապետը հայտնել է, որ Հայաստանն արդեն աշխատում է արտահանման նոր շուկաներ դուրս գալու ուղղությամբ։

«Այսօր արդեն մեր մի քանի գործարար պատվիրակություններ մեկնել են ուղևորությունների։ Մենք արդեն ունենք վարդերի, մրգերի և բանջարեղենի գնումների կոնկրետ առաջարկներ»,- ասել է նա։

Փաշինյանը նաև ընդգծել է արտահանման շուկաների դիվերսիֆիկացման կարևորությունը՝ հայտարարելով, որ Հայաստանի տնտեսությունը չպետք է կախված լինի մեկ ուղղությունից։

Հայաստանից ՌԴ արտադրանքի մատակարարման սահմանափակումների մասին

«Ռոսսելխոզնադզորը» ժամանակավոր սահմանափակումներ է մտցրել Հայաստանից մի շարք արտադրանքների ներմուծման համար՝ որպես պատճառ նշելով «ԵԱՏՄ և Ռուսաստանի բուսասանիտարական պահանջների հաճախակիացած խախտումները»։ Սահմանափակումները մայիսի 22-ից անդրադարձել են ծաղկային և պարենային արտադրանքին, մայիսի 30-ից՝ թարմ լոլիկին, վարունգին, պղպեղին, կանաչուն և ելակին, հունիսի 2-ից՝ թարմ խաղողին և կորիզավոր մրգերին (բալ, կեռաս, ծիրան, սալոր, դեղձ և նեկտարին)։

«Ռոսսելխոզնադզորում» նաև հայտարարել են, որ հունիսի 2-ից հայկական կողմը պետք է կասեցնի կենդանի ձկան և ձկնամթերքի կենդանաբուժական հավաստագրումը ռուսաստանյան ստացողների հասցեով բոլոր հայկական ընկերություններից, բացառությամբ տեսչական ստուգում անցած երկու ձեռնարկությունների։

Բացի այդ, «Ռոսպոտրեբնադզորը» կասեցրել է Հայաստանից «Ջերմուկ» հանքային ջրի բոլոր խմբաքանակների, ինչպես նաև հայկական երեք արտադրողների գինու և կոնյակի ներմուծումն ու շրջանառությունը Ռուսաստանում։