Միասին՝ հանուն հայկական կրթության և մշակույթի ապագայի: Առաջնարդվելով այս գաղափարախոսությամբ, «ՀԵՆՔ» Համազգային Բարեգործական Հիմնադրամի և Լեհաստանում գործունեություն իրականացնող «Հայկական Հիմնադրամ»-ի (Armenian Foundation) միջև կնքվեց համագործակցության հուշագիր:
Այս համագործակցությունը նոր էջ է հայկական կրթամշակութային ոլորտում, որի նպատակն է ամրապնդել 2 կազմակերպության գործընկերային կապեը: Կողմերը կարող են համատեղ իրականացնել կրթական և մշակութային ծրագրեր, որոնք նպատակաուղղված են հայ երիտասարդության կրթական մակարդակի բարձրացմանը, ազգային ինքնությունն ու պատմամշակութային ժառանգությունը պահպանելուն և զարգացնելուն։
Հուշագրի շրջանակում, 3 օր շարունակ կազմակերպությունների ներկայացուցիչները մասնակցել են տարաբնույթ ու բազմաբովանդակ միջոցառումների: Մասնավորապես, «ԼՈՒՍէ» Հիմնադրամի հարկի ներքո, կազմակերպվել է տարածաշրջանում նախադեպ չունեցող մեծ մասշտաբի կրթամշակութային խաղ, որը նվիրված է Կիլիկիայի հայկական թագավորության պատմությանը։
Այս եզակի ուսուցողական խաղի նպատակն է խորացնել ուսանողների պատմական գիտելիքները Կիլիկյան Հայաստանի վերաբերյալ, զարգացնել թիմային աշխատանքի հմտությունները և բիզնես մտածելակերպը, ձևավորել խելացի ռազմավարական մտածողություն՝ երիտասարդ սերնդի մեջ։
Կազմակերպված միջոցառումները շարքը համալրեց «Մեր Երգը – Մեր Պատմությունն է» խորագիրը կրող երեկույթը: Այն իր օրհնությամբ բացեց Տեր Շահեն քահանա Հայրապետյանը:
Երեկոյի ընթացքում, «Կիլիկյայի հարստություն» մրցախաղի կազմակերպչական աշխատանքներին աջակցելու և ակտիվ մասնակցություն ցուցաբերելու համար եղան շնորհակալագրեր և պարգևներ, որոնք մասնակիցներին հանձնեցին Հայաստանում և Լեհաստանում գործող վերոհիշյալ հիմնադրամների տնօրենները՝ համապաասխանաբար Լիլիթ Սահակյանը և Մարտա Աքսենտովիչ֊Բոշիվիցին։
Եղան նաև անակնկալ պարգևներ: Իսկ երեկոյի գեղարվեստական մասն ապահովեցին «ՀԵՆՔ» վոկալ-գործիքային անսամբլի կատարողները և Ալեքս Բատյանը՝ «Զեփյուռ կդառնաս» երգով:
Ներկաներին հուզեց «Հայոց սրբության սրբոց Արարատ» երգը Գայանե Բաղդասարյանի կատարմամբ:
Երեկոյի ավարտին հնչեց «Հուսո առագաստ» երգը՝ Տարոն Հակոբյանի և անասմբլի կատարողների ձայնակցմամբ:
Արմինե Մկրտումյան